Lafaek News—Moris Iha mundu ne’e, ema hotu sempre iha hakarak atu muda nia moris iha planeta dahaat ida-ne’e, ema ne’ebé iha forsa buka moris konsege hadi’a hela fatin hodi helik netik husi udan been labele turuk kona, no responde nesesidade uma laran, ema ne’ebé laiha kbiit susar tebes atu muda moris maske hakarak tebes atu hela iha uma dignu.
Avo Celestina Marçal de Jesus ho idade (64), hela iha Beto Tasi, Suku Madohi, Postu administrativu Dom Aleixo, Munisípiu Dili, durante tinan 22 ona hela de’it iha uma ne’ebé la merese ona atu hela tanba tempu udan avo Celestina la’o iha bee leten ne’ebé udan sulin husi kalen kuak no didin leet hamosu fali debu kiik iha uma laran book la mós la di’ak.
Kbiit laek ne’e konta nia istória moris katak, durante ho nia kaben matebian Luis Aleixo hela iha fatin ne’e dezte 1979 too ohin loron, uma ne’e reabilita fali iha tinan 1999, maibé agora uma nia kondisaun la di’ak ona atu hela.
“Tempu udan ami nain rua bei-oan labele toba tanba bee nalihun iha uma laran habokon hotu toba fatin entaun ha’u hein bee ne’e maran mak foin toba,” dehan Avo Celestina ba lafaek News iha nia rezidensia Beto tasi Dili, foin lalais ne’e.
Avo Kbiit laek ne’e deklara, durante ne’e la’os susar de’it ba kondisaun hela fatin maibé hahan mós laiha, at liután familia ida mós la tau matan, maibé oan feto ida ho oan mane ikun mak sempre haree no fo hahan bikan ida ba nia iha loron-kalan.
“Karik estadu hanoin no konsidera ha’u hanesan ninia sidadaun entaun ajuda hadia netik ha’u nia uma ne’e karik mak la hanoin ha’u entaun hau nia hela fatin mak núne’e de’it ona tanba ha’u nia kbi’it mak la to’o atu hadi’a uma ne’e,” nia relata ho matan Ben
Atividade ne’ebé lor loron nia halo mak hili Ai-lele fuan maran ne’ebé monu ba rai maibé susar atu hetan osan tanba besik tinan ida mak ai-lele ne’e bele nanoku iha saku no faan saku ida ho folin $.5 maibé ida ne’e han tempu naruk,
“Ha’u hili Ai-lele fuan ne’e la ba dook ida tanba ha’u nia kondisaun la dun di’ak no ha’u nia forsa mos la’os hanesan uluk tanba ne’e ha’u hili ai-lele fuan iha de’it bairo laran depois fila mai ha’u loke tiha tau ba karon besik tinan ida mak ema ruma hameno atu sosa entaun ha’u foin hetan osan tanba ha’u ” avo Celestina deklara.
Nia realsa, osan ne’ebé nia hetan husi ai-lele fuan uza hodi ajuda oan sira sosa foos han hamutuk, maibé tempu di’ak mak avo Celestina sosa la’os beibeik
Iha fatin hanesan, Lourdes Aleixo hanesan avo Celestina nia oan feto ida ne’ebé sempre ajuda hahan ba Avo Celestina hatete, iha mehi atu hadi’a nia Avo Celetina nia uma maibé kbi’it la to’o no sira só ajuda hahan hahan,
Jornalista : Orlando Magno
Editora : Egidio Nono
