Lautém (Lafaek News)-Komunidade preokupa ho folin fós ne’ebé sae iha munisípiu Lautém, postu administrativu Lautém, suku Baduro, tanba vendedór fos hasa’e folin tuir sira nia gostu de’it.
“Antes ne’e folin fós ne’e $13.00 ne’e 25 killo agora sa’e ba $14.50 centavos no ida 30 killo ne’e uluk $16.00 agora sae ba $17.50 centavos, tan ne’e ami preokupa ho folin fós agora tempu estadu emerjénsia, ami nia produtu sira ne’ebé faan mós ema la sosa,” dehan komunidade, João da Costa ba Lafaek News, iha suku Baduro, (15/03/2021)
Nia husu ba governu atu foti medidas rigorozu ba ema emprengadór sira ne’ebé hasa’e folin fós tuir sira nia gostu.
“Ami sei mate hamlaha wainhira governu la toma atensaun ba sira ne’ebé faan fos tanba batar sira ne’ebé ami kuda mos la isin, tanba ular han hotu, agora folin fós mos komesa sae, ami atu foti osan husi ne’ebe mak atu sosa foos tan ne’e ha’u husu parte governu liu-liu AIFAESA atu haree problema ida ne’e ho sériu,” dehan nia.
Jornalista : Anselmo Monteiro
Editór : Floriano Soares
