Lafaek News—Ministériu Saúde (MS), resjista tan kazu positivu Covid-19 foun nain 18, husi numeiru ne’e nain 14 iha munisípiu Dili no nain 4 seluk husi sentru saúde Uailili Munisípiu Baukau, rekuperadu nain 3, no atual baixa iha sala izolamentu sa’e ba 97.
“Ohin kazu foun 18, iha mane na’in 4, feto na’in 14, labarik idade 12 mai kra’ik iha na’in 4, idade husi 16 to’o 44 iha ema na’in 14, hotu-hotu asintomátiku, ka la hatudu sintomas, husi totál kazu foun ne’e sira na’in 14 iha munisípiu Dili,” dehan kordenadór forsa tarefas ba prevensaun no mitigasaun surtu covid-19, Rui Maria de Araujo, ba jornalista sira liu husi Meeting Zoom, Domingo (14/03/2021).
Koordenadór hatutan, detalles liu maka hanesan kazu pozitivu 2 husi aldeia Mate-Restu, suku Vila-Verde, postu-administrativu Vera-Kruz, pozitivu hirak ne’e kontaktu besik ho kazu ida ne’ebé loron rua liu bá relata husi vigilánsia sentinela iha Sentru Saúde Formoza.
Kazu pozitivu 7 husi aldeia Lurumata 03, suku Fatuhada, postu-administrativu Dom Aleixo, pozitivu hirak ne’e kontaktu besik ho kazu ida ne’ebé loron rua liu bá relata husi vijilánsia sentinela iha Sentru Saúde Formoza.
Nune’e mós nia dehan, kazu pozitivu 1, husi aldeia Frekat, suku Bairro Pité, postu-administrativu Dom Aleixo, pozitivu hirak ne’e kontaktu besik ho kazu ida iha cluster Ministériu Finansas (MS).
Kazu pozitivu 1, husi aldeia Fomento 03, suku Komoro, postu-administrativu Dom Aleixo, pozitivu ida ne’e kontaktu besik ho kazu konfirmadu ida husi Cluster aldeia 4 Setembru, ne’ebé mós hetan transmisaun husi nia la’en husi Cluster Ministériu Transporte Komunikasaun (MTK).
Nia dehan, kazu pozitivu 1, husi aldeia Teki-Teki, suku Bairru-Pite, postu-administrativu Dom Aleixo, pozitivu ida ne’e kontaktu besik ho kazu konfirmadu ida husi Cluster aldeia 4 Setembru, ne’ebé mós hetan transmisaun husi nia la’en husi Cluster MTK.
Kazu pozitivu 1 husi aldeia Aimutin, suku Komoro, postu-administrativu Dom Aleixo, pozitivu ida ne’e kontaktu besik ho kazu konfirmadu ida husi Cluster aldeia 4 Setembru, ne’ebé mós hetan transmisaun husi nia la’en husi Cluster MTK.
Kazu pozitivu 1, husi aldeia Tasi Mean, suku Comoro, postu-administrativu Dom Aleixo, pozitivu ida ne’e kontaktu besik ho kazu konfirmadu ida husi Cluster Emergency Obstetrics and Neonatal Care.
“Kazu detetadu ka pozitivu iha Munisípiu Dili husi dia 7 de Marsu to’o ohin, hamutuk hotu 67,” nia hakotu.
Jornalista : Sandi Belo
Asisten Editór : Pedro de Almeida
