Lafaek News—Autoridade Protesaun Sivil (APS-sigla Portugués), Segunda 10/06/2024, relata relata hahú husi loron 21 to’o 27 fulan Juñu 2024, APS rejistu uma kain hamutuk 113 mak hetan estragus husi dezastre naturais.
Vitima dezastre natureza hetan apoiu emerjensia husi APS.
Dezastre naturais ás liu iha munisipiu hirak hanesan Aileu, anin sobu uma 1, Ainaro bee sa’e no rai halai estraga uma 2, Munisipiu Baucau ahi han uma 1, munisipiu Bobonaro anin sobu uma 1, Covalima bee sa’e estragus uma kain 171, munisipiu Dili ahi han uma armazen 1, Liquiça mate ida mout iha tasi, Manufahi bee sa’e tama uma 30, ahi han uma 1, munisipiu Viqueque erosaun rezulta uma 1 no Raeoa anin sobu uma 3.
“APS fornese asisténsia emerjénsia ba família afetadu sira mak hanesan ai han no la’os ai han (food item no non-food item), tanba dezastre naturais ne’e rasik, ema lakon vida 1, husi ne’e, total númeru vítima afetadu hamutuk 712, ne’ebé akontese iha munisipiu sira ne’ebé mak iha territoriu Timor-Leste”. Porta-vos APS João de Sousa Filipe, ba jornalista sira iha konferénsia imprensa, Segunda 10/06/2024.
Nia dehan, vítima sira ne’ebé mak evakua iha munisipiu Covalima ho Manufahi, komandu operasaun Autoridade Protesaun Sivil servisu hamutuk ho presidente autoridade munisipiu rua realoka hikas vítima sira ba ida-idak nia hela fatin.
“Ita haree númeru frekuénsia ne’ebé bo’ot liu mak bee tama uma hamutuk 302, no rai halai iha uma kain 2, ahi han uma iha uma kain 3, nune’e mós númeru afetadu ne’ebé mak foin lalais evakua hamutuk 712, durante semana ida nia laran, tanba ne’e Autoridade Protesaun Sivil husu ba komunidade sira atu hadok-an no hases an husi fatin ne’ebé mak risku, liuliu ba komunidade sira ne’ebé mak hela iha mota ninin nomós foho lolon, tanba husi sira ne’e mak risku ba rai halai no risku ba inundasaun”. Nia informa.
Nia haktuir, komandu APS, liuliu korpu bombeirus mós halo fornesimentu bee mos ba komunidade sira ne’ebé presiza nomós ba ai ne’ebé tohar hodi fó risku ba komunidade sira nia uma, sira sempre husu ajuda ba korpu bombeiru hodi tesi ai ne’ebé mak besik iha sira nia uma hun hodi evita dezastre ba komunidade uma.
Jornalista : Crispin de J. Amaral
Editor : Agapito de Deus
