Lafaek News—Dalaruma ita la sente moris ne’ebé nakonu ho triste hanesan Bendito no nia kaben Alinca dos Santo Gomes sente da-daun, loron-kalan hasoru moris moruk tebes, susar atu sente roman ba moris ksolok basá roman ne’e hateke hetan hanesan fitun iha leten as, maibé lolo liman la too.https://www.lafaeknews.tl/adelino-husi-ami-nia-matan-haree-ema-seluk-ninia-sente-la-hanesan-ho-saida-ita-mak-sente/
Maske mehi hakarak moris iha familia harmonia ninia laran, maibé kbiit la too no todan hirak ne’e budu no horik de’it iha Bendito ho Alianca no oan nain hat ninia moris loro-kalan.
Laran susar tebes bainhira haree situasaun moris iha uma kain Bendito ho nia kaben ho oan nain haat, iha aldeia Marobo suku Tokoluli postu administrativu Railako, munisípiu Ermera, loron matan tiru borus uma laran be mamuk, toba iha tahu leten no rai-rahun nia leten.
Uma oan ne’ebé saran moris Bendito Gomes ho nia kaben no oan nain haat, didin ho kalen roh-rohan hodi satan netik udan ho anin, didin husi okos no leten leet no nakloke an nune’e odan suli tama uma laran, no bee tama husi okos halo rai dodok iha uma laran be didin ho hadak ho kalen feruzen.
Bainhira iha tempu udan, Labarik nain tolu estuda la ho di’ak, udan no anin forte huu nakdoko no kalen tarutu husi kakuluk ho lian maka’s hanesan kari rai uut ba kakuluk leten, nune’e labarik nain tolu deside hakerek ABC ho 123 iha didin lolon hanesan kadernu hodi lé iha tempu estuda nian.
Maske, iha lei inan iha Artigu 10. Alineia dahuluk nian hateten estadu Repúblika Demokrátika Timór-Leste mós solidáriu ho povu hotu-hotu ne’ebé luta ba libertasaun nasionál, iha ne’ebé too oras moris hela iha situasaun ekonomia ne’ebé difisil tebes
Iha Artigu 20, hateten sidadaun sira-ne’ebé ferik no katuas (terseira idade), iha direitu ba protesaun espesiál hosi estadu iha Alinea 2, Polítika ba ema ferik no katuas sira-ne’ebé terseira idade, sei loke leet ba sira-nia partisipasaun iha moris sosiál, ekonómiku, kulturál, atu nune’e bele moris ho dignidade iha komunidade nia laran, tan ne’e povu hotu iha direitu moris livre ho independente, sentidu husi artigu ne’e nian mak povu kiik sira tenke livre husi presaun ekonomia, livre moris iha nesesidade ne’ebé respondidu, no labarik kiik sira iha direitu atu asesu edukasaun ho livre.
“Ha’u hanoin mos la hetan, maibé haree no sente de’it, atu halo oinsá, fiar de’it ba leten mak deside ami nia moris ne’e atu sai oinsá,” Bendito ho lian halerik ba lafaek news iha nia rezidénsia Tokoluli.
Didin lolon ne’ebé nakloke an dada udan been suli husi leet sira tama uma laran habokon labarik nain tolu nia kadernu, no bee kadalak sira tama husi didin okos ba uma laran hodi provoka rai sai dodok hasusar tebes sira nain neen la deskansa ho di’ak no labarik nain hat laiha nutrisaun di’ak, dala ruma semana rua ka tolu foin han sasoro dala ida, molok atu han sasoro bikan ida, Bendito tenke la’o loron tomak buka kabura ho ai-farina-tahan lori ba estrada hodi faan, sorte di’ak hetan dolar rua ka tolu foin sosa fos hakna’ok hodi tein netik ba labarik sira han dala ida.
Miguel da Conceição, hanesan viziñu sempre ajuda hahán ba familia kbiit laek ne’e, nune’e iha semana kotuk akontese udan boot, bee tama uma kain ne’e, estraga uma laran no labarik nain tolu nia kadernu no ropa eskola nian bokon hotu, durante kalan ida sira tuur de’it too dadeer, hanesan viziñu sente triste nune’e (Miguel) deside ajuda kalen tahan 40 ba Bendito hodi tulun taka netik uma kakuluk no taka didin sira ne’ebé luan atu udan bele kontinua tama halo dodok uma laran.
“Ha’u nia karakteristika ne’e social, entaun atividades sosial ne’e la’os foin halo, sempre apoiu maluk sira ne’ebé presiza ita nia tulun, haktuir Miguel ba Lafaek News foin lalais ne’e.
Lafaek News tenta konfirma Xefe ho Xefe aldeia Marobo suku Tokoluli postu administrativu Railako, munisípiu Ermera, liu husi telemovel atu koa’lia kona-ba família uma kain Bendito Gomes ho nia kaben Alianca dos Santos Gomes ho nia oan nain haat, maibé liña telefone preukupadu hela, nune’e lafaek news sei tenta nafatin atu halo konfirmasaun ho autoridade local iha suku refere.
Jornalista : Marcos da Silva Araújo
Editór : Agapito de Deus
