Lafaek News—Ema ne’ebé moris iha sidade laran la sente saida mak sira ne’ebé hela iha sidade Dili nia ninin, ema ne’ebé riku nunka hanoin saida mak terus no la hanoin maluk sira ne’ebé kiak terus iha nia rain rasik.
Sala ne’e hanesan fatin vizita ba bainaka sira. foto LN.
Objetivu ba ukun an nian atu hasai povu kiik no kiak sira husi terus, maibé implementasaun oin seluk, Timor oan puru sai vítima iha nia rain rasik, moris nakonu ho terus no susar, dook husi sidade no dook husi eletrisidade, nakukun falun iha oras kalan hodi hein naroman bainhira loron matan nakfera iha dader haroman netik uma laran liu husi didin leet no kakuluk leet.
Uma ne’ebé defisiénsia Adelino harii, reutiliza kalen frozen 99 nian husi uma hirak ne’ebé ema sunu hodi harii uma hanesan barraka didin ho kuartu rua no sala ida, didin ho hadak kahur ho kalen frozen hodi satan anin, didin haleu ho kuak ne’ebé naroman tiru burus no sente laiha seguru iha tempu kalan, no laiha mós seguru ba labarik sira atu estuda iha oras kalan, tanba laiha eletrisidade.
Defisiensia Adelino foto hamutuk ho nia kaben ho nia oan iha sala vizita nian.
Iha kobertura espesial ekipa lafaek news, hakat ba bairu Kuluhi aldeia Timor Kmanek suku Bairru-Pité, la’o ain oras ida, hakat liu foho lolon tolu, no hakur husi kadalak kiik sira ne’ebé nakfilak da-daun hanesan mota, is boot no kosar suli, maibé anin foho hamoos tutuir kosar be sulin iha isin lolon, hela de’it metro 50 atu besik ba defisiénsia Adelino nia uma, hateke hanesan uma hakiak animal sira nian, maibé rona labarik sira halimar haklalak iha uma laran, hakat ho ain toos, tanba imajina sala, loloos horik fatin defisiénsia ne’e ho nia oan na’in hitu nian.
“ Husi ami nia matan haree ema seluk nia sente la hanesan ho saida mak ita sente, tanbà Kbi’it ne’ebè ema iha la hanesan ho Kbi’it ne’ebè mak ami laiha, maluk ne’ebè Kbi’it iha la’o oin seluk, ami ne’ebè Kbi’it laiha tenki hela ho Kondisaun hanesan ne’e,” haktuir defisiénsia Adelino ba lafaek news iha nia uma Kuluhi Timor Kmanek, sabadu foin lalais.
Iha entrevista ho jornalista lafaek news, defisiénsia Adelino konta tuir, uma ne’e hanesan uma toos, maibé uma lolos anin sobu tiha too agora autoridade lokál ne’ebé sai nu’udar aman ba aldeia Timor Kmanek nunka hakbesik hodi haree no husu problema saida mak defisiénsia hasoru, nune’e nia deside hela iha uma toos nian hodi moris no haruka oan nain rua eskola too iha Permnas Bairru-Pite, maibé pasiénsia buat ne’ebè ema sente La hanesan ho saida mak Adelino nia família hasoru.
Jornalista ekipa lafaek news entrevista hela defisiensia Adelino Soares iha fatin varanda ne’ebe hafutar ho kalen kuak iha uma kakuluk. foto LN.
Adelino Soares haktuir, tinan rua ona mai hela iha ne’e kondisaun uma mak hanesan ne’e, udan sempre sulin tama tama husi , kalen sira agora dodok hotu, foin dadaun udan boot bee tma makas mai laran, Suli tun husi ne’e ba, ne’ebè udan kuandu mai ona ne’e araska loos.
“Udan tama ita sente triste, maibè pasiensia tanbà ita hasoru buat sira ne’e natureza fò mai ita tenki simu,” defisiénsia ne’e ko’alia iha entrevisa ne’e.
Nia Subliña ho situasaun ne’e la halakon defisiénsia Adelino nia vontade, maibé esforsu hodi hadia nafatin sai hanesan mahon ida ba nia ho kaben ona nain hitu hodi moris netik, atu hadia osan iha ne’ebé, tanba forsa laiha no la hanesan ema ho kondisaun normal.
“Atu hadia uma iha ne’e ita buka ai sira ne’ebè ita bele hamriik iha rai hodi tesi, hotu tiha mak família balu hela liu kraik ne’eba mai ajuda harii, maibè ita haree kaleen hirak dezde uluk 99 nian to’o agora, no ai-lahuk hotu ona, agora ita servisu mak sosa, agora ita nia moris hanesan ne’e ba foti osan iha ne’ebè,” defisiénsia ne’e haktuir.
Maske, la’o laiha forsa, la tuur iha uma hodi hein de’it, tanba see tuur iha fatin laiha buat ruma maka sei monu husi lalehan mai, tenke servisu leba ai-farina tahan tuun ba sidade buka netik osan uituan hodi sosa netik foos ba labarik sira iha uma, maibé see ema la sosa lori ba família sira troka ho foos hodi lori fila ba uma Kuluhi.
Ikus liu ekipa lafaek news atu husik hela fatin ne’e, defisiénsia Adelino Soares, hato’o nia sentimentu agredesimentu boot ba ekipa husi midia ne’e, tanba bele la’o too iha nia uma ne’ebé lokaliza iha area ne’ebé dook husi sidade, estrada laiha no susar atu labarik sir aba eskola, rona de’it balada sira hananu, labele rona lian karreta ho motorizadas, hakur foho lolon ne’ebé la’o ain ho oras 2 minutu 15 nia laran hafoin too iha uma defisiénsia ne’e nian.
“Ami sente kontente no agradese ba ita boot sira, tanba bele mai vizita ona ami, tanba ami nia xefe aldeia de’it ami nunka mai haree ami nia moris, anin sobu ha’u nia uma besik ona tinan rua resin ona, maibé laiha autoriade lokál ida mak atu mai husu netik oinsá ho ami nia moris, maske rai ne’e dook, hakur mota sa’e foho lolon, maibé ita boot sira laran luak bele mai haree ami nia kondisaun moris ohin loron atu bele fó sai informasaun ba governu bele hatene moris ami povu kbiit laek iha rural,” liafuan ikus husi defisiénsia bainhira ekipa lafaek news hasees an husi rezidénsia defisiénsia ne’e nian.
Iha observasaun Lafaek news sita kondisaun uma Adelino Soares ho nia fen Jacinta de Lima de Deus no oan nain hitu da-daun ho kondisaun grave no la merese atu sira bele hela, tanba harii besik bee dalan ne’ebé mosu iha udan boot.
Jornalista : Ekipa LN
Editór : Agapito de Deus
