Lafaek News—Kazu transmisaun lokal ne’ebé akontese iha postu Administrativu Fatumea, Suku Belulik Leten, Aldeia Klauhalek hahú alastra too ona aldeia Onu-Laran suku Maudemu postu Tiliomar munisípiu Kovalima ho númeru pozitivu ema 1.
Koordenadór Forsa Tarefa ba Prevensaun no Mitigasaun Surtu Covid-19, Rui Maria Araujo, informa, iha loron 25 to’o 26 Fevereiro 2021, ekipa konjunta vijilánsia epidemolójika no laboratóriu, kontinua halo rastreiu iha aldeia Klauhalek, suku Belulik leten, postu administrativu Fatumea, munisípiu Covalima, no rekolla tan amóstra husi ema ne’ebé kontaktu besik ho kazu primariu Klauhalek.
“Prosesu rastreiu ba kontaktu besik ho kazu primeiru Klauhalek horseik, hetan informasaun adisionál katak kazu primariu Klauhalek halo mós kontaktu ho ninia belun balu iha Tilomar, hafoin buka tuir, ekipa hetan duni sira, hafoin halo analiza laboratoriu, hetan rezultadu pozitivu ida (1),” esplika KFTPMS-Covid-19, Rui Maria Araujo, liu husi konferensia imprensa SIJK, CCD, sabadu, (27/02/2021).
Koordenadór esplika, kazu konfirmadu foun ida ne’e, mane ho tinan 42, servisu nu’udar estensionista, hela iha aldeia Onu-laran, suku Maudemu, postu administrativu Tilomar, halo kontaktu ho Kazu Primariu Klauhalek entre loron 11 ho 13 Fevereiru 2021.
Kazu konfirmadu foun ne’e seidauk halo viajen sai husi Kovalima, maibé iha kontestu hala’o ninia kna’ar nu’udar estensionista, nia halo kontaktu ho kolega servisu, ho mós superior irarkíku iha servisu munisípal agrikultura Kovalima, inklui mós ho populasaun balun iha Tilomar no Fatumea.
“Kazu foun ida ne’e hamosu indikasaun katak transmisaun lokal iha agrupamentu/cluster Klauhalek, nakdae’et tutan, ka espalla ona to’o Aldeia Onu-laran, Suku Maudemu, Tilomar, no iha mós posibilidade nakdae’et ka espalla ona iha Suai Vila, ho fatin seluk tan iha Covalima nia laran,” dehan nia.
Ekipa konjunta husi vizilánsia epidemolójika nivel nasionál, laboratóriu nasionál saúde, servisu munisípal saúde hamutuk ho autoridade administrativa Kovalima, ne’ebé integra iha unidade territórial sentru integradu jestaun krije, sala situasaun (SIJK, SS), munisípiu Kovalima nian, oras ne’e da-daun hatun ekipa 4 buka tuir ona ema hotu ne’ebé halo kontaktu besik ho kazu foun ne’e.
Iha konferénsia imprensa ne’e, Rui Maria Araujo apela ba populasaun iha Salele, Suai-Vila no iha Kovalima nia laran atu labele pániku, husu atu tu’ur hakmatek iha ida-idak nia fatin, lalika la’o ba mai , fó tempu atu ekipa saúde ho ekipa konjunta unidade Territóral Sentru Integradu Jestaun Krije (SIJK), munisípiu Kovalima, buka tuir kontaktu sira hotu atu foti amóstra hodi submete ba teste.
Jornaliata : Sandi Belo
Asisten Editór : Pedro de Almeida
