Lafaek News—Komunidade aldeia Rai-Ulun Sulu Leohitu, postu administrativu Balibo, munisípiu Bobonaru, transasaun ilegál sira buras iha baliza Balibo ho Indonézia tanbá nesesidade uma-laran mak obrigada.
“Dalaruma obrigatóriu tenke hala’o transasaun ilegál sira tanbá nesesidade mak obrigada duni,” kestaun ne’e hato’o husi reprezentante komunidade Rai-Ulun, Siquito da Silva iha nia rezidensia Rai-Ulun ba Lafaek news Segunda semana ne’e, katak maioria populasaun moris husi agrikultura, maibé dependente de’it ba udan been bainhira tun rai, kuandu bailoron susar tebes atu bele hetan osan ba fasilidade uma laran.
“Ami hela do’ok tebes husi bee matan kuaze kilometru rua resin ho nune’e Komunidade lubuk ida ne’e tinan barak ona ate agora sempre la’o do’ok buka bee ba konsumu loron-loron nian, maibé agora ami foin mak hetan tenik apiu husi PNDS ba komunidade ne’e rasik atu halo kanalizasaun ba bee moos ne’e maibé ida ne’e mos sei dependente nafatin mos ba eletrisidade tanbá bee matan ne’e iha tiha rai klean ba komunidade, signifika bee matan ne’e iha fali kraik mak dada sae ba komunidade sira iha leten, entaun presiza mos meius eletrisidade atu bele uza ba halo kanalizasaun bee moos ne’e,” Siquito sublina
Hodi dehan, ema barak moris husi produtu lokál hanesan kuda batar, fore-mungu, malus no tabaku ho ida ne’e maka atividade loron-loron nian ba vida moris nian maibé ida ne’e so tempu udan monu rai, kuandu udan laiha entaun defisil tebes atu halo atividade sira hanesan ne’e, liu husi produtu hirak ne’e mak bele lori ba fa’an iha merkadu nune’e bele hetan osan ba alojamentu uma laran nian.
Nia haktuir tan katak, Iha komunidade ne’e rasik hela viziñu tebes ho nasaun Indonézia nune’e kuandu dalan seluk laiha ona atu bele hetan osan entaun hakarak ka lakohi tenke meius komunikasaun seluk ho maluk viziñu rai sorin liu husi negósiu ki’ik ba kbi’it ekonomía ninan tanbá nesesidade importante liu buat hotu-hotu.
Jornalista : Paulo Collo
Editor : Agapito de Deus
