Lafaek News—Prezidente Konsellu Imprensa (KI), Otélio Oté, hateten reklamasaun husi joven Balibo kona-ba apoiu atividade desportivas KI la konsege fo tulun ho razaun proposta tama tarde.
“Iha parte seluk mos husi KI ladún ajuda di’ak kona ba sira nia Copa ne’e tanbá sira nia proposta ne’e tama tarde besik ita atu mai ona Balibo ne’e maka sira foin submete proposta ba KI nomós sira nia proposta mos ladún tama kategoria programa KI ninian tanbá sira nia proposta halai liu ba desportu ninian entaun ami simu de’it buat balun ne’ebé ami bele ajuda, restu ne’e ita atu aloka ba Ministériu desportu no ami sujere ba sira tinan oin tenke haruka ba antes kedas nune’e bele buka maneira, maibé enkornasaun tinan ida ne’e di’akliu tinan kotuk,”Prezidente KI, Otelio Oté ba lafaek news iha Balibo, segunda (16/10/2023) https://www.lafaeknews.tl/joven-balibo-lamenta-ki-la-apoiu-atividade-desportivas/
Lider orgaun KI ne’e fundamenta, antes atu selebra loron nasionál liberdade imprensa iha Balibo, kada tinan informasaun sempre kanaliza uluk ba komunidade sira liu husi administradór postu molok fulan Outubru, Ida ne’e akontese kada tinan no hetan partisipasaun máximu husi komunidade Balibo nomós jornalista sira, maibé dalaruma iha ema ida ka rua maka ladun simu informasaun husi ema seluk entaun sira labele mai partisipa.
“Ita nia ekipa ne’e mai dezde fulan Jullu atu partilla informasaun ba komunidade sira nune’e bele hola parte ba iha eventu ne’e rasik, sei ita la organiza di’ak entaun la furak maibé tinan ida ne’e la’o di’ak no kapás tebes,” Otelio Oté dehan.
Nia afirma, KI rasik atu fahe informasaun to’o iha idak-idak nia suku ne’e la’os kompeténsia KI tanbá iha xefe administradór no xefe suku nomós aldeia, tanba ne’e maka KI sempre halo enkontru ho autoridade suku sira antes atu mai selebra.
Iha sorin seluk komunidade Siquito da Silva aumenta tan katak, Komunidade Balibo sempre hatene kona-ba selebrasaun loron importante liberdade imprensa ne’e maibé laiha informasaun ruma husi parte xefe suku ka aldeia ninian i balun de’it maka simu informasaun.
“Ami hatene duni katak iha loron 16 fulan Outobru ne’e loron nasionál ba liberdade imprensa ne’e maibé ami la simu informasaun husi autoridade lokal sira entaun ami balun hakmatek de’it iha uma,” nia hakotu.
Ekipa Lafaek News
Editor : Paulo Collo
