Lafaek News—Visé-Primeiru Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay informa, Timor-Leste sei organiza forum negósiu internasional durante loron tolu iha Timor Leste.
“Ha’u mai relata ba Prezidente Repúblika kona-ba forum business ba iha forum internasional ne’ebé sei partisipa husi emprezáriu lubuk ida husi rai hotu-hotu liu-liu ASEAN” dehan Francisco Kalbuadi Lay iha Ai-tarak laran Dili, tersa (14/11/2023).
Forum internasional ne’e organiza husi Ministériu Koordenador Asuntu Ekonómiku no Kámara Komérsiu Industria Timor-Leste (CCI-TL) ne’ebé sei hahu husi loron 23 to’o 25 fulan-Novembru tinan ne’e.
Governante nee mos atualiza ba Xefe Estadu José Ramos-Horta, kona-ba preparasaun TL nia adezaun ba Organizasaun Mundiál Komérsiu-OMK.
“Adezaun ita finaliza ona, sei falta atu kompleta lejislasaun hira, karik aban Konsellu Ministru aprova ona, depois ratifika iha PN, nune’e bele lori mai PR atu promulga,” governu ne’e relata.
Antes ne’e reprezentante Timor-Leste ba Zenebra, Lurdes Bessa hateten, TL sei adere ba OMK iha 2024, tanba sei kompleta tan lejislasaun balun.
Jornalista : Epifania I. Pinto
Editor : Agapito de Deus
