Lafaek News—Ohin loron sábadu, (13/02/2021), Ministériu Saúde detekta tan kazu Covid-19 foun ema Timor-oan 1 pozitivu baixa ona iha sala izolamentu Vera-Kruz, no total pozitivu sa’e on aba 39.
“Atualiza kazu positivu foun Covid-19, ohin 13 fevereiru 2021 husi komisaun nasionál rejista tan kazu konfirmadu positivu Covid-19, Timor-oan na’in 1, Pasiente ne’e feto ho idade 28, asimtomátiku,” dehan dermatolojista koordenadora jeral komisaun Covid-19, Odete da Silva Viegas, iha konferénsia imprensa, palasiu das sinzas, kaikoli, sabadu (13/02/2021).
Koordenadór esplika, iha dia 28 janeiru 2021 Timor-oan ne’e ho nia-oan feto ki’ik tinan 1 fulan 7, sira na’in 2 viájen husi Atambua, Indonézia mai Timór desidi liuhusi dalan ilegál ka klandestina iha área memo nian Munisípiu Bobonaro.
“To’o iha Maliana Inan ne’e konsege aluga motór ojek hodi lori sira na’in 2 atu mai liu Dili. Wainhira sira to’o iha Kuartel Unidade Polísia Fronteira (UPF) Batu-Gede nian hetan liu husi pasa revista husi ajente Polísia UPF no identifika katak sidadaun ne’e tama klandestina. Iha biban ne’e kedas Polísia UPF lori Inan ho oan ne’e ba iha Kuarentena Batu-Gede. Mota-Ain, Batugede, Munisípiu Bobonaro,” dehan Kordenadora.
Nia hatutan, iha kalan tuku 08:30 ne’e kedas ekipa ba halo teste swab, rezultadu pozetivu, relata pozetivu iha data ne’ebé hanesan (12/2).
“Inan pozitivu ho nia-oan dadauk ne’e iha ona izolamentu maibé iha sala ketak no nia kondisaun mós di’ak hela, agora liga fali ho ojek na’in ne’e ekipa halo tiha ona investigasaun ho pasiente Covid-19 maibé nia dehan katak lakuñese ema ne’e inklui mós númeru matrikula motor refere,” nia reafirma.
Enkuantu, dadus Covid-19, loron 13 fevereiru 2021, Komulativu Teste 20100, Komulativu Negativu, 19770, Hein Rezultadu 229, Komulativu Kazu 101, Kazu Foun +1, Atuál Baixa 39, Rekuperadu 0, Komulativu Rekuperadu 62+4 = 66, Kuarentena 236 (Dili: 168, Munusípiu: 68), Auto-Kuarentena 79 (Dili: 60, Munisípiu: 19), Passa ona 14 dias 7845 (Dili: 6455, Munisípi: 1390).
Alende ne’e mos nia deklara ba públiku tomak liga ho informasaun kontaktu direta ka Close Contact ne’ebé kuaze ema barak partilla iha sosial media katak relasiona ho ilegál ida-ne’ebé pozetivu iha 8 fevereiru tama husi dalan illegal Batugede no uja ojek hodi mailiu iha Kuluhun, Dili hodi hasoru-malu ho nia- kaben.
“Liu husi biban ida-ne’e atu hato’o katak iha 12 fevereiru ekipa vijilánsia halo tiha ona investigasaun ba ema na’in 4 ne’ebé diskunfia Close Contact ho ida ne’ebé konfirmadu Covid-19, entre sira ne’e mane na’in 3 ho idade 45, 7, 5 nomós feto 1 ho idade 7,” nia informa.
Nia dehan, bainhira investiga illegál pozetivu ne’e, nia la fó informasaun klean katak nia hasoru nia-laen iha Kuluhun depois mak nia bá fali Betó, Comoro. Enkuantu, Iha 28 janeiru ilegál pozetivu ne’e ho nia-kaben aluga Taxi hodi ba iha família iha Betó, maibé família la simu no kontaktu kedas ba parte vijilánsia hodi bá tula lori bá kuarentena Tíbar.
“Ekipa kontaktu kedas ba Señora Eliza no ekipa vijilánsia hamutuk ho ekipa Sentru Integradu Jestaun Krizi (CICG) no Polísia tula kedas nia-kaben ho oan na’in 3 ne’ebé diskunfia close contact ne’e lori ba submete kuarentena iha ótel Novo Horizonte. Horseik (12 fevereiru) ekipa foti sira-nia swab teste no rezultadu teste hatudu negativu Covid-19,” haktuir nia
Iha mós sidadaun Ilegal na’in 1 husi Postu Administrativu Turiscai, Munisípiu Manufahi, Ilegal Mane ne’e idade 36, Nia halo Close contact ho mane na’in 1 ho idade 34.
Nia viájen husi Indonézia (Surabaya-Kupang-Atambua) iha 9 fevereiru. 11 fevereiru Husi Atambua tama mai Timór liuhusi dalan ilegáI área Batu-Gede nian.
” Husi Batu-Gede mai Dili ho Bus (transporte públiku) no tuun iha terminál Tasi-tolu, Iha Tasi-tolu, nia família hein kedas no tula fali nia ho motór ba Turiskai. To’o iha Turiskai iha kalan tuku 09:00, Polísia no ekipa vijilánsia husi Sentru Saúde Turiskai foti kedas sidadaun refere lori bá triajen iha Sentru Saúde Turiskai,” hatete nia.
Nune’e, Sentru Saúde Turiskai komunika ba pontu vokál vijilánsia iha Serbísu Saúde Munisípiu (SSM) Manufahi no pontu vokál mós informa direta ba parte vijilánsia nasionál no Diretóra SSM Manufahi.
“SSM Manufahi infrenta difikuldade transporte, maibé lakonsege refere illegál ne’e mai Dili nune’e sidadaun ilegál toba kalan ida iha triajen Sentru Saúde Turiskai, orseik (12/2) ekipa vijilánsia kordena ho ekipa CIGC bá tula ona ilegál mai hodi submete ba kuarentena iha ótel Novo Horizonte, Dili, Swab teste foti iha 12 feverieu no rezultadu PCR Test hatudu ilegál ne’e negativu Covid-19,” hakotu nia
Jornalista : Sandi Balo
Asisten Editor : Pedro de Almeida
