Lafaek News—Diretór Ezekutivu Sentru Audivisual Max Sthal Timor-Leste (CAMS-TL-Sígla Portugés), Eudicitio Pinto hateten, Timor-Leste iha istória barak kona-bá luta libertasaun nian, maibé istória barak seidauk valorizasaun husi entidade Timor Leste hodi hatutan ba jerasaun foun.
Tanba ne’e, Eudicitio reafirma, CAMSTL hola papél importante hodi kontinua prezerva istória luta Timor-Leste nian, nune’e bele hatutan ba jerasaun foun sira, presiza hatene valores istória ne’e ba kategoria siénsia, halo investigasaun liu-liu ba arkivu sira.
“Ita riku ho istória, mais ita la valoriza ita-nia istória, entaun istória ne’e mate. Ita tenke diskute kle’an beibeik, tanba ne’e siénsia” hateten Diretor Exzekutivu CAMSTL, iha abertura esposisaun no aniversáriu CAMSTL ba dala-20, iha Fundasaun Oriente Díli (Tersa-Feira, 07/11/2023).
Sentru Audivisual ne’e mós kontinua servisu maka’as hodi halo prezervasaun no konservasaun didiak materia hirak ne’ebé produs ona husi Saudozu Max Sthal.
Iha aniversáriu tinan 20 ne’e, CAMSTL hakarak lori istória ne’e ba estudante sira hodi bele konsiente katak, materia sira ne’e sai hanesan siénsia hodi konta ba jerasaun tuir mai.
“Ita iha plataforma tolu ne’ebe ita kria atu estudante sira bele asesu. Ita kria tiha ona durante tinan 10 resin maibé ema seidauk asesu, tanba ne’e mak agora oportunidade diak para ema bele asesu materia sira ne’e” dehan Ezekutivu ne’e.
CAMS-TL harii husi saudozu Max Sthal iha tinan 2003, hodi prezerva no konserva istória rezistensia Timor-Leste nian durante tinan 25 no hetan ona rekonesimentu husi UNESCO.
Observasaun lafaek news iha semináriu internasional ne’e hala’o iha Fundasaun Oriente Akait Dili Timor Leste ho durasaun loron tolu no partisipa husi orador internasional sira kompostu husi Cuba, Austrália, Brazil no Portugal, inklui orador husi Timor Lete.
Jornalista Estajiada : Epifania I.Pinto
Editor : Agapito de Deus
