Lafaek News-Ministériu Saúde (MS) rejista tan Timor-óan na’in 3 ne’ebé pozitivu Covid-19, pasiente sa’e ba rua nulu resin hitu (27) ne’ebé mak baixa hela sala izolamentu iha Dili 26 no na’in 1 iha Rejiaun Administrativu Espesial Oe-Cusse Ambeno (RAEOA).
Dadus atual ba iha loron 4 fevereiru 2021 ne’ebé mak akontese iha Timor-Leste, komulativu teste 19506, hein rezultadu 55, komulativu kazu 80, kazu foun +3, komulativu negativu 19371, atuál baixa 27 Dili 26, RAEOA 1, kuarentena 235, Dili : 121, Munisípiu 114, Auto-Kuarentena 149, Dili 142, Munisípiu 7.
Kordenadora Pilar III COVID-19, Josefina Clarinha João
“Ita komisaun nasionál rejista tan sidadaun Timor-óan na’in 3 ne’ebé konfirmadu pozitivu covid-19 kompostu husi feto 1 no mane 2, Entre sira na’in tolu iha na’in 1 sidaddaun bai-bain no na’in 2 seluk nu’udar estudante, Feto ho idade 21 no mane ida ho idade 22, ida seluk 29, Sira na’in 3 laiha sintoma,” Esplika Kordenadora Pilar III COVID-19, Josefina Clarinha João, iha konferénsia imptensa, palásiu das sinzas, Kaikoli, Kinta (04/02/2021).
Nune’e, Pasiente idade 21 antes ne’e hela iha konventu Kupang, Indonézia Osidental no Mane idade 22 nu’udar estudante iha universidade iha Bali.
Pasiente hirak ne’e mai husi Indonézia husi provinsia ne’ebé la hanesan, iha 20 janeiru 2021 sira tama Timor-Leste husi liu hosui pontu entrada Batu-Gede hamutuk ho pasajeiru na’in 118.
“Sira kumpre kuarentena obrigatóriu iha ótel Novo Horozonte, ekipa vijilánsia epidemolójika ba halo teste swab da-huluk iha 21 janeiru ho rezultadu teste negativu, teste da-ruak foti iha 1 fevereiru no iha 3 fevereiru rezultadu laboratóriu hatudu katak sidadaun na’in rua ne’e hetan Covid-19, no horikalan ekipa jestaun kazu husi Pilár 7 evakua ona pasiente rua ne’e ba sala izolamentu Vera Cruz, Dili,” nia informa.
Nia hatutan, Mane ida ne’ebé ho idade 29 iha 20 janeiru 2021, sai husi Salele, Munisípiu Covalima ba Atambua Indonézia liuhusi dalan ilegal, iha 22 janeiru nia desidi fila mai Timór liuhusi Malaka no tama nafatin liuhusi dalan ilegal parte Salele nian.
Iha loron 22 ne’e kedas, Polísia Patrullamentu Fronteira (UPF) kaptura no lori ba submete iha kuarentena.
“Ohin, ekipa vijilánsia ba foti amostra swab, no rezultadu teste hatudu katak sidadaun ne’e pozitivu Covid-19. Dadauk ne’e ekipa prepara ona atu transporta mai sala izolamentu Vera Cruz Dili,” dehan nia.
Nune’e mós, iha kuarentena suai iha ema na’in 16 mak kumpre hela kuarentena, na’in 15 nu’udar ekipa servisu hanesan médiku, enfermeiru, pesoaál limpeza no seguransa.
Jornalista : Sandi Belo
Editór : Floriano Soares
