Lafaek News—Komunidade aldeia Suku-Laran, suku Kamea, postu administrativu Kristu-Rei, munisípiu Dili, iha tempu bailoron sosa bee hodi konsumu iha moris lor-loron.
Komunidade sira kuru bee ne’ebe uluk beiala sira kee iha suku Kamea.
“Ami nia aldeia ida ne’e bee laiha, bee ne’ebé mak ami konsumu loro-loron ne’e ami ba kuru iha be’e matan mak ami monta besi hodi dada netik tun mai, hodi hadau malu bee ne’e tanba komunidade iha aldeia ida ne’e konsumu hotu be’e ida ne’e, dehan kominidade aldeia Suku-Laran, Alfredo Felix iha residénsia suku-laran, sábadu semana ne’e.
Sidadaun ne’e haktuir, bee matan ne’e too tempu bai-loron maran, pasiensia obriga sosa de’it bee tanki ida ho folin $.20-$.35, pasiénsia tenke sosa tanba bee importansia liu iha nesesidade loro-loron.
“Ami nia komunidae ne’e uma kain barak entaun bee ne’e ami kuru hadau malu de’it, udan entaun ami konsumu mos udan been sei iha tanki boot ida hodi rai hela hodi konsumu tein, fase ropa, no nesesidade loron,” katak sidadaun ne’e.
Nia parte sente triste tebes durante ne’e la konsumu bee ne’ebé mak di’ak, tanba ema barak hadau malu, iha Dili laran komunidade barak uza bee ho di’ak aldeia ne’e mak moris ho sosa bee hodi konsumu.
Iha sorin seluk Xefe Aldeia Suku-Laran, Mario Coreia, afirma nia parte rekoñese komunidade sira nia preokupasaun ne’e, durante ne’e hato’o on aba ema boot sira maibé too hela agora laiha rezultadu ruma.
“Enkontru ruma mos ha’u hatoo ona ba Xefe suku no haruka karta ba, ate agora nia solusaun seidauk hetan, da-daun ne’e ami konsumu mak bee ne’ebé mak kee iha tempu beiala sira nia mak ami uza besi ida dada mai hodi ami konsumu hadau malu,” dehan autoridade lokál ne’e.
Bazeia ba dadus ne’ebé lafaek news asesu husi xefe suku Kamea, katak númeru populasaun iha aldeia Suku-Laran total uma kain 192, total membru familia 920, kompostu husi feto 456 mane 464.
Jornalista : Rita Moniz
Editora : Nelya Barros
