Lafaek News— Suku Waimori, Postu Administrativu Vikeke Villa, munisípiu Vikeke ne’ebé uluk iha tempu okupasaun illegál Indonézia sai akontanamentu ka baze ba forsa FALINTIL, maibé da-daun ne’e suku refere la hetan atensaun hosi governu Timor Lorosa’e.
Xefe Suku Waimori, Francelino A. D. Datubo’o Gomes, katak fatin refere uluk iha tempo rezisténsia sai fatin favoritu ba guerrileiru sira hodi konsentra maibé hafoin Timor Lorosa’e hetan ninia independénsia kuaze tinan Sanulu Resin Ualu ona governu la tau matan oinsá atu hadi’a para jerasaun foun sira bele hatene valór hosi fatin istóriku ne’e rasik.
“Waimori iha tempo rezisténsia ema dehan fatin ne’e hanesan rezisténsia nian, maibé to’o ukun aan waimori estadu Timor abandona nafatin,” Francelino ba LafaekNews foin lalais ne’e iha CCD-Dili.
Nia informa, alende monumentu ne’ebé hamarik no inaugura rasik hosi komandu en xefe forsa armada FALINTIL Kayrala Xanana Gusmão ne’ebé to’o agora la hetan atensaun hosi governu, problema seluk ne’ebé suku refere enfrenta kuaze tinan naruk nia laran maka liña eletrisidade no dalan.
“Kona-ba waimori nia preokupasaun agora dadaun ne’e estrada, eletrisidade no tuir tan mak bee moos,” nia tenik
Tanba ne’e nia reforsa, ho problema ne’ebé dezde ukun aan hasoru to’o de’it agora, hanesan autoridade sempre hato’o ba estadu maibé mezmu esforsu hotu ne’ebé halo la iha konsiderasaun hosi parte governu.
“Nu’udar autoridade lokál sente triste, tanba proposta hirak ami hato’o kualker governu ida mosu (membru governu) iha ami nia suku hato’o más ate a data la iha resposta ida mai ami,” afirma nia
Entretantu suku Waimori uma kain hamutuk 514 no total populasaun 2007.
Kontribuitor a : Carla Madalena da Silva Borges
Editór : Ezequias Tomás
