Lafaek News–Loron tersa 5/01/2021 Fundasaun Xanana Gusmão fo apaoiu kareta mikrolete ho marka Sentru Miguel Magone ida ba uma mahon Sentru Miguel Magone hodi hala’o tulun transporta labarik sir aba eskola.
Apoiu kareta mikrolete ne’e fó direta husi lider karizmátika Kay Rala Xanana Gusmão, ba sentru Miguel Magone (Uma Mahon) no husu atu utiliza ho kuidadu nune’e bele dura ba tempu narauk.
iha imajen ne’e, Eis PR no eis PM, Kay Rala Xanana Gusmao entrega xave no dokumentu karreta nian ba Prezidente Uma Mahon (SMM), Cipriano O.de A. Freitas, iha edefisiu Uma Mahon Balide. tersa (05/01/21). Foto LN.
“Ha’u agradese tebes ba funsionáriu sira husi uma mahon centro Miguel Magone , tanba sira ba dada ha’u husi salão seminário menor, iha loron 27 de dezembro 2020 , atu bele mai too uma mahon, hodi bele haree rasik matan kondisoens difisieis ne’ebe staff enfrenta, atu halo sira nia atividade. Dehan Fundador Kay Rala Xanana Gusmão iha uma mahon, Tersa 5/01/2021.
Iha biban ne’e eis Prezidete Repúblika ne’e husu funsionáriu tomak, husi uma mahon ne’e, atu dedika-an nafatin hodi hodi proteje labarik sira, tuir diretu fundamental ba labarik, ne’ebe uma mahon defende.
Iha sorin seluk presidente fundasaun uma mahon Sentru Miguel Magone, Cipriano Oliveira de Almeida Freitas, sente orgullu tebes ba fundasaun Xanana Gusmão ne’ebe mak ohin loron fo supreza kareta mikrolete (1) hodi bele sustenta ona atividade loron loron nian liu-liu ba labarik sira nia atividade.
“Mikrolete ne’ebe mak ohin loron too mai iha uma mahon ne’e bele hakman ona ami nia servisu loron-loron nia liu-liu alin sira iha uma mahon ne’e rasik, transporte ne’ebe mak agora dadaun iha ne’e atu tula labarik sira ba eskola, tanba sira mai hela iha ne’e ami tenke hatama ba eskola, no ho kareta ida ne’e mos ho programa reunifikasaun ami bele tula sira hodi ba intrega iha sira nia famillia, no fasilita ba ospital karik hetan moras ruma, uza transporte ne’ebe mak iha dehan persidente ne’e,” fundadór ba Uma Mahon ne’e afirma.
Maibé antes ne’e iha loron 27/12/2020, fundasaun Xanana lori ona kama andar sanulu, troka jelera tuan tau ba foun hotu, no hahan foos, naan, modo tahan, no vevidas ba labarik sira bele konsumu loron nia, no hahan balun uma mahon konsumu ona iha loron 1 janeiro 2021 selebra ba loron tinan foun nian.
Fundasaun Xanana Gusmão mós promote, tinan 2021 ba oin atu hadia di’ak liu tan uma mahon Centro Miguel Magone. Nia hakotu
Jornalista : Rita Moniz
Editora : Nelya Barros
