Lafaek News–Tomas Taquino Guilmor Francis Gonçalves Soares, hanesan na’in ba Futeból Klube (FC) Maudoko, afirma iha tinan tolu liubá foti desizaun hodi fila mai Timor Lorosa’e tanba hadomi no hakarak kontribui ba dezenvolvimentu desportu iha rai doben ida ne’e.
Bainhira loro matan hahú mosu iha dadeer, mosu iha hanoin hakarak dezenvolve setór desportu iha nasaun doben ne’e, tanba hadomi tebes rai Timor Lorosa’e maski dala barak iha ema balun hatete aat maibé ida ne’e la habaruk ninia espíritu luta hodi kontribui mós ba dezenvolvimentu rai ida ne’e.
Maski dala barak hosi ema nia ko’alia aat hamosu baruk iha nia neon maibé nafatin koko no forsa nafatin liuhosi orasaun ne’ebé hasa’e ba aman Maromak haraik nafatin grasa hodi bele liu situasaun difisil ida ne’e.
Tuir mai iha dada lia badak ho jornalista Lafaek News nia hato’o oinsá bele transforma mehi ne’ebé durante iha moris atu sai ba realidade hodi konsege bele realiza tanba hakarak kontribui ba dezenvolvimentu nasionál liuhosi area desportu.
“Iha 2017 ha’u ho kolega na’in rua lori Maudoko mai Timor, hahú husi zero, ami rekruta rekursu umanu foun, iha estrutura to’o ba daudaun hamutuk 15, ho esperiénsia ne’ebé iha ami halo atividade sira ne’e iha pozitivu. Atividade futeból Seven side (jogu ne’ebé hala’o uza kampu estádiu maibé utiliza sorin ka meiu kampu) ba dala uluk halo iha Timor no atividade ne’e hetan support hosi kompañia hanesan SMB Travel ho Eureka,” Taquino ba Lafaek News iha kna’ar fatin Delta, segunda (25/01).
Hatutan nia, antes grupu Maudoku muda mai Timor Lorosa’e, sira hahú halo uluk eksebisaun ne’ebé servisu hamutuk ho artista Indonézia. Intensaun atu hatudu ba sira katak ezisténsia Timoroan iha Jakarta no atu halakon perspetiva ema nian katak Timoroan ne’e idéntiku ho brutalism no la hatene halo buat di’ak.
Dehan nia, nu’udar joven nia prioridade la’ós atu konta istória pasadu, hodi hatún malu maibé oinsá koñese ita nia poténsia hodi investe no utiliza, hodi bele sobrevive iha mundu modernu ida ne’e.
Nia fó ezemplu, ita iha poténsia hanesan emprendedorizmu (hahú hakas aan hosi zero) iha area ne’e, halakon karakter moe no baruk iha ita nia moris atu mehi sira labele sai mehi de’it maibé bele transforma sai realidade.
Entretantu nia mós haktuir uitoan kona-ba prosesu moris ninian ne’ebé dala barak sai problema ba ema balun hodi politiza no ko’alia aat maibé nia nafatin firme ho fuan boot simu no konsidera ida ne’e sai hanesan lisaun importante atu avansa nafatin ba oin.
Dehan nia, moris iha Jakarta, 14 Agostu 1987, oan hosi aman domin (matebian) Mateus Virgílio Soares, hosi Munisípiu Manatutu, Postu Administrative Laklubar, no inan Filomena Gonçalves hosi munisípiu Ermera, postu administrative Atsabe.
Reforsa nia, razaun moris iha ema rain tanba avó iha ne’ebá no nia aman no inan mós iha hotu ne’ebá tanba eskola iha Bandung, ho ida ne’e nia ultrapasa moris to’o boot iha ema rain.
“Ha’u hahú eskola hosi SD to’o ba Universidade iha Jakarta, maibé la konsege finaliza (gradua) tanba moris independente (la tane liman) entaun involve aan iha organizasaun duke foku ba estudu,” afirma nia
Nune’e mós iha sorin ida nia dehan harii grupu Maudoko iha 2015, momentu ne’ebá embaixada Timor Lorosa’e iha Indonézia hala’o eventu desportiva ho objetivu halibur Timor oan sira iha ema rain hodi selebra komemorasaun loron restaurasaun independénsia 20 Maiu.
Liuhosi eventu refere nia hamutuk ho kolega na’in 11 harii grupu refere hodi partisipa mós, maibé iha momentu ne’ebá grupu ne’ebé sira harii sai problema uitoan liuliu ba públiku Timor oan sira iha ne’ebá ho idade 40 ba leten tanba liafuan Maudoko ba sira hanesan lia mal ida. Hatete nia, maibé ho esplikasaun ne’ebé kle’an ba inan aman no públiku maka hahú kedas iha ne’ebá Maudoko sai trend to’o ohin loron.
Akresenta nia, alende partisipa tiha eventu ne’ebé embaixada Timor Lorosa’e selebra, embaixada mós kontinua support no rekomenda ba Maudoko atu partisipa mós iha eventu internasionál hanesan Street Soccer iha Jakarta, kona-ba apoiu finanseiru hodi Maudoko FC bele partisipa iha eventu ne’e mai hosi empreza Indonézia oan ida ne’ebé laran osan mean ho naran Prio nu’udar na’in ba kompañia EUREKA. Iha eventu refere Maudoko FC hetan Kintu lugar hosi partisipante 32 ne’ebé hala’o iha ANCOL Jakarta 2016.
Ikus antes ramata dada lia informa nia, daudaun ne’e Maudoko FC sei foku prepara aan hodi partisipa iha liga federasaun FFTL no prosesu rejistrasaun iha Notariadu atu sai asosiasaun desportivu, tanba ne’e nu’udar kritériu atu partisipa iha liga refere.
Apela nia, ba maluk Timor oan sira hotu labele pesimista, maibé optimist nafatin, kuandu sente iha abilidade ka koñesimentu ba area ida labele para de’it iha ne’e maibé tenke transforma hodi dezenvolve area ne’ebé ita domina iha ita rain.
“Ha’u nia mensajen mak ne’e, nu’udar Timoroan ita hotu matenek no iha hanoin di’ak ba rai ida ne’e, tanba ne’e saida mak ita sente iha kapasidade atu halo ita lalika moe. Maibé koko no hatudu hodi halo buat foun ne’ebé diferente ho ema seluk, loos katak ita bele tuir ema ne’ebé susesu maibé se bele ita susesu ho ita nia dalan rasik,” hakotu nia.
Jornalista : Felisberto Fernandes da Costa
Editór : Ezequias Tomás
