Lafaek News—Governu liu husi Programa Nasionál Suku (PNDS), munisípiu planeia harii uma ba ema kbiit laek sira iha ona planu atu harii uma 102 ba ema kbiit laek iha munisípiu Lautém.

Diretór PNDS Munisípiu Lautem Acacio Carvalho, hateten da-daun tékniku PNDS ho sektores sira hotu hahú halo sosializasaun ba komunidade iha suku 34 iha munisípiu Lautém atu nune identifika ema kbiit laek duni mak iha direitu atu hetan uma ne’e.

“Iha Munisípiu Lautém iha suku 34 sukus kada suku ida iha aldeia ida de’it mak hetan uma 3 husi governu, governu planu ona atu halo uma ba kbiit laek sira fazeadamente tuir fali mai sei ba fali aldeia seluk iha suku 34 iha munisípiu ne’e,” katak diretór PNDS munisípiu Lautém ba jornalista sira nia kna’ar fatin PNDS Lautém foin lalais.

Hodi dehan, mata dalan iha ona no halo sosializasaun iha munisípiu iha seman kotuk, uma ne’ebé atu harii ba ema kbiit laek sira ho medida 6×6 kompostu husi kuartu 3, sala vizita, inklui fatin han no dapur no haris fatin 1, tipu segundu nian iha kuartu rua, sala vizita ida, han fatin ida no haris fatin, maibé sei bazeia ba survey familia ne’ebé sai benefisiáriu se bazeia ba klasifikasaun rua ne’e.

Diretor PNDS ne’e hateten, iha loron 19 Janeiru ne’e halo ona sosializasaun nivel munisípiu loron 2 de Fevereiru fulan oin, sei halo ona sosializasaun ba suku sira, fulan Marsu 2021 ne’e sei implementa ona programa harii uma ba kbiit laek sira iha munisípiu ne’e.

“Osan ne’ebé sei gasta ba uma kbiit laek sira kada uma ida 14 mill too 17 mill dolares Amerikanu, programa ne’e sei implementa tuir programa dezenvolvimentu suku ne’ebé durante ne’e la’o ona,” dehan Acacio.

Jornalista   : CE. Lautem

Editora        : Nelya Barros