Lafaek News–Diretor Jerál Servisu Migrasaun (DJSM), Superintendente Asistente Luis Soares Barreto informa, sidadaun ne’ebé halo viajen ba Indonézia-Timor-Leste liu husi dala ilegal la tuir regras estadu nian sei hetan multa ba estadu.
“Sidadaun neebe tama no sai fronteira liu husi dalan ilegal iha situasaun Serka Sanitaria no Estadu Emerjensia nia laran, Ami sei foti desizaun hodi fo sansaun ba sira multa osan $.250 hatama iha kofee estadu,” dehan DJSM Luis Soares ba Jornalista Iha ministeriu Interior Vila-Verde Dili, kuarta 11/08/2021.
Superintendente Asistente Luis esplika, sidadaun Sira hatene hela situasaun ne’ebé mundu tomak infrenta no mos Timor-Leste nia fronteira agora lockdown hela, maibé sira hakarak tama sai liu dalan ilegal tanba ne’e parte imigrasaun tenke fo multa ne’ebé máximu ba sira.
‘‘Imigrasaun nafatin kontrola estranjeiru sira, maibé ami iha de’it odamatan boot la halo patrolla iha fatin seluk tanba ami nia fatin mak iha odamatan ne’e,’’ katak Luis.
Entretantu tuir dadus neebe jornalista Lafaek News asesu, hahú husi fulan Juñu too ohin loron sidadaun ne’ebé halo viajén dalan ilegal hamutuk 143, maibe sira nain 30 prosesa ona ba Ministériu Publika.
Jornalista : Orlando Magno
Editór : Agapito de Deus
