Lafaek news- Governu liu husi Konsellu Ministru(KM), kuarta (11/08) hala’o sorumutu hodi deside mantein impozisaun serka sanitária iha munisipiu Dili no mantein konfinamentu obrigatoriu iha munisipiu Ermera to’o loron 26 fulan agostu 2021.
Ministru Prezidénsia no Konsellu Ministru (MPKM) Fideliz Manuel Leite Magalhães hateten, projetu rezolusaun governu nian ne’ebé mantein impozisaun serka sanitária iha munisípiu Dili no Ermera to’o tuku 23:59 husi loron 26 fulan agostu.
“Projetu Rezolusaun Governu nian ne’ebé mantein konfinamentu domisiliáriu jerál ba populasaun husi Postu administrativu Ermera no Postu Administrativu Railaku, iha Munisípiu Ermera nian, to’o tuku 23:59, husi loron 25 fulan-agostu” dehan MPKM hafoin remata enkontru KM iha Palasio Governu Dili, kuarta (11/08/21).
Projetu rezolusaun ne’e sei bandu sirkulasaun ema sira-nian entre munisípiu Dili no Ermera no sirkunskrisaun administrativa sira seluk, iha kazu ne’ebé fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.
La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.
“Neduni iha área hotu-hotu iha Postu Administratitu Ermera no Postu Administrativu Railaku nian, bandu atu transporte públiku, liuliu mikrolete, biskota no anguna halo sirkulasaun no bandu atu halo selebrasaun relijioza koletiva, no bandu mós atu hala’o serimónia fúnebre ne’ebé envolve partisipasaun ema na’in sanulu liu.
Durante serimónia ne’e rasik tenke uza máskara oin nian hodi taka inus no ibun no mantein distánsia metru 1 ho ema seluk ne’ebé prezente iha serimónia ne’e no estabelesimentu komersiál, industriál, artezanál ka prestasaun servisu nian taka ba públiku.
Enkuantu tuir dadus jerál covid-19 iha munisipiu Ermera kazu positivu covid-19, da-daun ne’e ativu hamutuk 722, kazu komfirmadu 871 no kazu rekoperadu 149, totál kazu positivu covid-19 iha munisipiu Díli ne’ebé ativu hela hamutuk 473, kazu akumulativu komfirmadu 8.665 no rekuperadu 8.171.
Ho nune’e dadus jerál covid-19 iha timor leste hahú iha loron 21 fulan marsu 2020 to’o agora hamutuk kazu ativu 1.544, kazu akumulativu komfirmadu 11.717, kazu rekoperadu 10.44 no kazu óbitu 29.
Jornalista : Etelvina Sarmento
Asisten Editora : Juvita dos Santos
