Lafaek News—Xefe suku Komoro, postu administrativu Dom Aleixo, munisipiu Dili, Eurico da Costa de Jesus, ezije governu liu Ministériu Solidariedade Sosiál no Inkluzaun (MSSI), atu aselera prosesu pagamentu $.200 ba reklamante iha faze daruak.
“Ha’u hato’o ba governu atu bele aselera ema nia prossesu pagamentu, tanba dadaun ne’e tama ona epoka udan no besik ona loron bo’ot natal no tinan foun nian, tanba nesesidade ekonómika ne’e inportante ba populasaun sira nia moris,” dehan Xefe suku Comoro, Eurico da Costa de Jesus, ba lafaek news iha Loja Leader Supermerkadu Comoro, hafoin partisipa distribui sasan Cesta Bazika ba Komunidade sira, sesta semana ne’e.
Xefe suku dehan, reklamante husi suku Komoro hamutuk 1222 seidauk hetan pagamentu tanba ne’e nia rekomenda ba governu prosesa lalais, inklui mós relatoriu sira ne’ebé husi Comoro ema 86 ne’ebé ami hatama fila fali osan.
“Ida ne’e bele halo identifikasaun ba programa tuir mai bele simu iha tempu badak nia laran, no la’o tuir programa ne’ebé governu hala’o. Ha’u mós simu ona informsaun husi MSSI ho Ministeriu Administrasaun Estatal hatun ona lista 11 mill katak aprova ona, iha fulan ida ne’e nia laran to’o natal reklamante tenke simu ona,” nia hakotu.
Jornalista : Pedro de Almeida
Editora : Nelya Barros
