Lautém –(Lafaek News)— Komunidade Suku Bauro, Postu Administrativu Lospalos, Munisípiu Lautém prontu hein atu simu nesesidade bázika ne’ebé governu sei distribui, hanesan parte ida hosi rekuperasaun ekonómia.
“Tanba polítika oitavu governu jilid II ne’e, nesesidade sira sei fahe bazeia ba kabesa. Tanba ne’e totál populasaun iha suku ne’e 3763 kabesas mak sei simu cesta bázika ne’ebé governu sei oferese mai. Tanba ne’e ami iha suku ne’e prontu atu simu programa ne’ebé governu atu oferese mai ami,” xefe suku Bauro Cidalio Freitas ba LafaekNews, foin lalais ne’e iha aldeia Luarai.
Nia informa, bazeia ba órario, suku refere tuir loloos simu tiha ona, maibé tanba failansu tékniku entaun prosesu refere adia tiha.
“Tuir loloos iha suku Bauro, halo ona distribuisaun iha dia 23. Maibé tanba diferénsia dadus suku nian, tanba ne’e sei adia hodi halo loos tiha fali dadus hafoin bele simu,” dehan xefe suku Bauro.
Ikus nia afirma, antes ne’e informa ona ba komunidade hotu iha aldeia suku ne’e rasik, atu simu pródutu saida de’it mak sei fornese hosi parte governu. Tanba ne’e, hanesan povu tenki apoiu nafatin programa governu nian hanesan mós kontribui ona ba dezenvolvimentu nasionál.
Jornalista : Elidio Castro
Editór : Ezequias Tomás
