Lafaek News—Peskizadór Organizasaun Naun-Governamentál (ONG) La’o Hamutuk, Marta da Silva, preokupa ho ezekusaun orsamentu Covid-19 tanba to’o ohin loron governu liuliu Minitériu Saúde seidauk bele selu hotu kompañia ne’ebé fornese ai-han no otél sira.
“Karik halo pagamentu ne’ebé la justu ba kompañia sira, ha’u sente sira mós bele hetan difikuldade. Hodi nune’e sira mós bele hasai fali traballadór ne’ebé servisu ho sira tanba hasoru kríze finanseiru,” Peskizadór ONG La’o Hamutuk Marta, ba Lafaek News iha nia knar fatin Bebora, sesta semana ne’e.
Salienta nia, governu aloka orsamentu ne’ebé ho montante bo’ot tokon $335 hanesan ne’e ba de’it prevensaun no rekuperasaun ekonomia maibé ninia ezekusaun hamosu fali problema, tan ne’e nia hateten, Sé uluk mak governu hasai osan montante bo’ot fasil hanesan ne’e hodi investe ba setór ne’ebé produtivu, edukasaun no liuliu saúde dala ruma ita nia prevensaun ba kúalker moras liuliu hanesan ohin loron covid-19 bele dehan avansadu ona.
Reforsa nia hodi rekoñese, maibé ita nia governu la halo ida ne’e, foin hakfodak bainhira moras ne’e mai hodi investe osan montante bo’ot ho fasil maibé ninia ezekusaun foin mak atinji 38,9 porsentu.
Ikus nia akresenta, mezmu ita nia kapasidade menus no preparasaun hodi hasoru atake hosi pandemia refere tarde, tanba mosu uluk tiha mai mak foin hakfodak maibé grasa maromak la iha ida mak mate. Nune’e iha parte ketak peskizadór Luta Hamutuk alende preokupa ho kapasidade ezekusaun fundu covid, nia husu ba sidadaun hotu nafatin kumpre prótokolu hosi saúde mundíal hodi mantein nafatin distansiamentu fíziku, uza máskara la’o iha fatin públiku tanba daudaun ne’e nasaun viziñu Indonézia númeru afetadu sa’e makas.
Jornalista : Felisberto da Costa Fernandes
Editór : Ezequias Tomás
