Lafaek News—Eskola pre-eskolar BEMMALAIA CORDIOSA DE ARCANJUS Manleuana-Dili, dezde harii to’o agora enfrenta kedas problema ba bee moos.
“Ba ami eskola ida ne’e, tinan rua ona difisil tebes, ami la asesu ba bee moos,” Koordenadór pre-eskolar BEMMALAIA Cosme dos Santos Freitas, hato’o problema ne’ebé enfrenta ba LafaekNews, sesta (04/12).
Informa nia, liga-ba problema refere sempre hato’o ba autoridade lokál maibé to’o agora eskola refere kontinua halerik ba bee moos.
Nia husu, ministériu edukasaun tenki toma atensaun mós ba asuntu refere tanba edukasaun sai setór importante hodi bele dezenvolve nasaun ne’e.
“Ami hanesan pre-eskolar ida ne’ebé eziste, hakarak hato’o ba governu liuliu ministériu, atu kontinua survei ida uluk halo tiha ona iha Foho leten ne’e. Katak rai na’in prontu atu governu lori bee mai iha komunidade Manleuana no mós ba eskola ida ne’e, agora hein de’it governu bainhira mak bele halo projetu (dada bee moos),” Nia Hakotu.
Enkuantu edukasaun sei labele la’o di’ak kuandu sein apoiu hosi fasilidade ne’ebé di’ak, hanesan mós bee. Hanesan fatór importante hodi bele garante prosesu aprendizajen la’o ho di’ak tanba iha ambiente ne’ebé ijiene no saudável hodi bele fó saúde di’ak ba estudante sira, tanba nasaun ida sai forte iha tempu oin mai bainhira garante kualidade edukasaun ba ninia sidadaun sira.
Jornalista : João da Costa Soares.
Editór : Ezequias Tomás
