Lafaek News- Avo Domingas Vicente (54), hosi Munisípiu Bobonaro, Suku Holsa, Aldeia Bilikou, maski ho kondisaun fíziku ne’ebé bele dehan hetan lalais moras, kuandu habai aan kle’ur iha loron matan nia okos maibé tanba de’it nesesidade hanesan umanu presiza hahán, obriga nia aan hodi hetan netik osan sosa foos saku ida.
Avo Domingas iha oan na’in 4 kompostu hosi feto 3 mane na’in 1, maibé idak-idak hela ho nia fe’en la’en, ho nune’e avo Domingas hela ho nia kaben domin Afonso Sequera.
Ba Lafae kNews Avo Domingas ho isin coklat kahur ho kinur uitoan (kulit kuning kecoklatan-sigla Indonézia) konta, dezde iha tempo okupasaun hala’o moris nu’udar negosiante to’o agora. Avo ne’e dehan, la iha ema ida moris mai hakarak terus maibé tanba deside hosi aman maromak hanesan umanu simu realidade moris ne’e.
Alende ne’e tanba karater ema ne’ebé la gosta tane liman hakarak ka lakohi, maski loron nia manas han daudaun kulit hodi rezulta kulit sai maran, maibé tanba bukae hodi aguenta peregrinasaun iha mundu ne’e. Deside hakat hakaman aan hodi ba fa’an sasán nesesidade báziku iha merkadu.
“Hau fa’an tinan barak ona, dezde tempu Indonézia to’o ohin loron, nafatin fa’an tanba de’it foos karon ida hodi bele han netik ho modo futun ida,” Avo Domingas ho oin triste kahur ho hamnasa midar konta ba LafaekNews iha merkadu Maliana, sabadu (05/12).
Entretantu produtu ne’ebé mak Avo Domingas fa’an mak hanesan Lis Me’an no Mutin, Malus no Bua, Aimanas no Lakeru Dikin. Maioria produtu ne’ebé Avo Domingas fa’an orijin produsaun rai laran tanba sosa hosi agrikultór suku Saburai no mós hosi Marobo.
“Kada loron ida sé ema hola barak entaun ha’u bele hetan $10 to’o $20, maibé kuandu ema la hola entaun centavos 5 tebes-tebes mós la hetan, lori fila-fali ba uma hodi kontinua fa’an iha loron aban,” dehan Avo Domingas ho hatudu oin buis la’ós tanba hirus, maibé tanba impaktu hosi loron nia manas, halo mós jornalista Lafae kNews la aguenta maibé tanba responsabilidade kontinua tu’ur dada lia nafatin ho Avo.
Avo Domingas haktuir hodi reforsa, triste ho kondisaun moris ne’ebé hasoru maibé la sente kolen hodi nafatin buka osan sosa netik hahan ba han.
Alende ne’e antes taka konversa ho jornalista Lafaek News Avo Domingas mós argumenta, da-daun ne’e ho Avo mane hela de’it iha uma simplis ho kondisaun ne’ebé la favóravel, maibé nafatin hela tanba fatin mak ne’e ona.
“Ha’u nia uma mós aat ona, kadaves ko’ak ona, ha’u ho ha’u nia la’en taka netik, uza tripleks atu nune’e udan labele tama,” Avo Domingas hakotu ho oin triste ne’ebé hatudu mo-moos iha matan nakonu ho mata-wen
Jornalista : Zeferino Barreto Gomes
Editór : Ezequias Tomás
