Lafaek News—Ministeriu Saúde liu husi Sentru Integradu Jestaun Krize, Sala Situasaun (SIJK-SS), Rui Maria de Araújo,informa, ohin 02/04/2021, ekipa vijilánsia deteta tan kazu pozitivu Covid-19 foun na’in 34 iha Dili, rekuperadu 24, atual baixa 461
“Ohin, iha Munisípiu Dili iha kazu foun 34, nune’e, kazu pozitivu iha Munisípiu Dili husi dia 7 de Marsu 2021, to’o ohin, 2 de Abril de 2021, hamutuk hotu 527, enkuantu horseik mai ohin hamutuk hotu Laboratóriu Nasionál Saúde (LNS) halo 632 testes PCR, inkluí 223 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili,”esplika Koordenadór Forsa Tarefas ba Prevensaun no Mitigasaun Surtu Covid-19, Rui Maria de Araújo, SIJK-SS, Sesta (2/04/2021)
Rui hatutan, Kazu iha Munisípiu Dili, iha cluster foun 2, Ataúru ho Aldeia Rai Na’in, Suku Bairro Pite, Totál iha cluster 50 maka sei nafatin hatudu atividade hada’et-tutan virus SARS-CoV-2, husi ema ida ba seluk, liu-liu iha Suku Madohi, Bebobuk, Fatuhada, Komoro, Bairru Pité, Motael, Kulu-Hun, Lahane Oriental, Bekora.
Hakarak informa mós katak, kazu pozitivu rua iha Ataúro, halo viajen husi Dili iha dia 31 de Marsu Iha Dili sira hela iha Bidau Santa Ana, ekipa konjunta saúde buka-tuir hela sira nia kontaktu-besik Dili no mós iha Ataúro.
Enkuantu dadus jerál Covid-19 ba loron ohin 2/04/2021 nian; Kazu foun ohin 34, Kazu rekuperadun24, Totál kazu ativu 461, no Husi totál kazu foun ohin mane 19, feto 15, Sintomátiku: 2, Asintomátiku: 34.
Totál pedidu autorizasaun esepsionál atu sai husi serka sanitaria iha Munisípiu Dili, horiseik dia 1 de Abril, hamutuk hotu 167 Sekretariadu SIJK responde hotu kedas, maibé 24 pedidus la priense kriteriu tuir rezolusaun governu.
Nia Informa, Kazu grave 1 ho moderadu na’in 3 iha fatin Izolamentu Vera-Kruz, kontinua hatan atensaun husi ekipa medika sira nia kondisaun estável Kazu moderadu 2 hahú halo mobilizasaun no ezerísisu fíziku, no-mos nafatin apela ba komunidade iha fatin ne’ebé maluk sira rekuperadu sira hela bá, favor labele tauk, labela halo diskriminsaun ba sira, tamba sira ne’ebé sai husi fatin, ekipa saúde sira sertifika ona katak sira laiha ona risku atu hada’et-tutan virus ba ema seluk.
Jornalista : Sandi Belo
Asisten Editór : Egidio Nono
