Lafaek News—Sentru Integradu Jestaun Krije-Sala Situasaun (SIJK-SS) ohin sesta (09/04/2021), deteta kazu pozitivu Covid-19 foun hamutuk 70, nain 53 iha kapital Díli no nain 17 iha munisípiu sira, kazu rekuperadu 48 no númeru baixa sa’e 515.
“Ohin kazu foun 70, husi total kazu detetadu foun mane 46, feto 24, iha munisípiu Dili 53 no munisípiu sira seluk 17, sintomatiku nain 4, asintomátiku nain 66,” esplika kordenadór forsa tarefas ba prevensaun no mitigasaun surtu Covid-19, Rui Maria de Araújo, ba jornalista sira liu husi komunikandu imprensa, Sesta (9/04/2021)
Nia dehan iha Munisípiu Dilii, dia 9 de Abril deteta kazu detetadu foun 53. Nune’e, kazu detetadu ka pozitivu iha Munisípiu Dili husi dia 7 de Marsu 2021, to’o ohin, 9 de Abril de 2021, hamutuk hotu 742.
Ho nune’e, iha Munisípiu Dili, reorganiza cluster tuir area jeografika suku nian ho fatin propagasaun seluk mós, hamutuk hotu iha 23 cluster.
ne’e mós iha Munisípiu Baukau, ohin deteta tan kazu foun 1, kazu pozitivu hirak ne’e ba husi Dili, hamutuk hotu iha Baukau 35 kazus detetadus. Ho baze ba informasaun ne’ebé disponível, ekipa konjunta saúde halo fali revizaun ba foku propagasaun/cluster iha munisípiu Baukau ho baze área jeográfika, total iha cluster 5 iha Baukau.
Iha munisípiu Manatutu deteta kazu foun 1, kazu ida ne’e halo viajen husi Dili, no iha Munsípiu Covalima deteta tan kazu pozitivu 13, kazu pozitivu hirak ne’e halo viajen husi Dili iha dia 7 de Abril de 2021.
Portavos dehan, iha Munisípiu Lautem deteta tan kazu pozitivu 2. Kazu hirak ne’e, iha kuarentena iha Lospalos, tan ne’e kazu detetatu foun iha dia 9 Abril 2021: 70 (53 iha Dili, 17 iha Munisípiu sira seluk), kazu rekuperadu iha dia 9 de Abril 2021: 48, total kazu ativu ohin dia 9 de Abril 2021: 515, no iha munisípiu sira seluk ho RAEOA, la deteta kazu foun.
Jornalista : Sandi Belo
Asisten Editór : Pedro de Almeida
