Lafaek News— Reitór Institutu Superior Cristal (ISC), Sebastião Pereira informa, ISC implementa ona prosesu aprendizajem liu husi sistema online no plataforma virtual tan ne’e estudante sira tenke uza telefone android.
“Iha tempu emerjénsia estudante sira tenke iha telefone android, se laiha buka meius ida buka kolega atu estuda hamutuk nune’e sira bele kooperasaun no estuda hamutuk,” dehan reitor ISC Sebastião ba jornalista iha ISC Balide Dili, Domingu (21/03/2021).
Reitor ISC ne’e akresenta, husi universidade laiha kbi’it atu distribui telefone android ba estudante sira, maibé agora ne’e dijitál no mundu teknolójia, tanba ne’e estudante ida-idak buka telefone android atu asesu iha prosesu aprendizajen online.
“Universidade labele distribui telefone android, laptop no komputador maibé inan aman rasik mak tenke sosa mobile ne’ebe kapasidade boot tanba ne’e husu ba estudante sira ne’ebe la iha ekipamentus sira hanesan ohin hau temi ne’e tenke buka meius nune’e bele tuir proseau aprendizajen online,” Nia relata.
Estudante sira bele akompania mós prosesu transmisaun husi dosente ba estudante sira, tanba balu bele lee de’it no balu akompañia direta husi online, maibé problema ida mós kona-ba rede sosiál.
“Problema ida mak pulsa, Rede sosial laiha laptop laiha komputadór atu asesu ida ne’e, maske aplikasaun zoom ne’e dosente aplika ona ba sira maibé ita nia rede sosial mak la’o ladún di’ak, maibé estudante sira tenke esforsu aan,” Reitor ne’e subliña.
Jornalista : Orlando Magno
Editor : Nelya Barros
