Lafaek News—Ministériu Solidariedade sosiál inkluzaun (MSSI), entraga ona foos sakas 85 ba Instituisaun Superior Kristal (ISC), atu fahe ba estudante ne’ebé hela iha kost.
Vise-Ministra MSSI Signi Chandrawati Verdial informa, da-daun mosu pandemia ida ne’e naruk entaun governu presiza ajusta planu no ideia hotu atu responde situasaun emerjénsia ba estudante sira ne’ebé hela kost.
“Total foos ne’ebé ohin ita entrega ba Institutu Superior Cristal hamutuk sakas 85, maibé lista sei nafatin ajusta mak liu ida ne’e entaun Ministériu Ensinu Superior Siensia no Kultura ho universidade halo reajustamentu ba lista,”esplika vise ministra MSSI Signi ba jornalista iha ISC Balide Dili, Domingu 21/03/2021.
Vise ministra MSSI Signi esplika, Universidade hotu MSSI rekolla dadus iha MESSK ne’ebé responsavel ba iha universidade hotu tuir mai submete ba MSSI hodi verifika dadus ne’e loos mak fóin apoiu ba estudante ne’ebé hela Kost.
Ajuda ida ne’e hanesan governu hatutan de’it inan aman sira nia liman iha situasaun difisil hanesan ne’e ita fó Foos saku ida kada estudante se ba oin estadu estende tan serka sanitária entaun MSSI sei kontinua desizaun hirak ne’e.
“Da-daun ita ajuda mak foos de’it tanbá ita iha parseiru ne’ebé governu australia fó iha sira nia rekezitus maibé parseiru sira hatete sira indika kedas ema ne’ebé moris bulneralvel sira mak fó ajudus,” nia relata.
Iha fatin hanesan Reitór ISC, Sebastião Pereira hatete, iha nia parte sente orgullu no apresia ba MSSI nia apoiu ba estudante sira maske apoiu ne’e natoon, maibé estudante sira bele tahan hamenus netik sira nia difikuldade.
Entretantu jornalista Lafaek nia observasaun iha terenu sita, estudante sira ne’ebé hela kost antes atu ba simu foos tenke lori deklarasaun husi aldeia ka husi kost nain.
Jornalista : Orlando Magno
Editora : Nelya Barros
