Hakerek na’in nu’udar estudante husi

Departamentu: Polítika Públika, Fakuldade  Siénsia Sosiais e politica

Universidade Nasional Timor Lorosa’e UNTL,

Eskola Ativista Diretus Humanos,:  Klase Intermediáriu,

Numeru kontaktu: 73253633

Email : soareasisaias96@gmail.com

 Timor-Leste nu’udar país ne’ebé ho pozisaun hanesan estadu direitu demokrátiku ida ne’ebé hetan nia direitu ba autodeterminasaun hodi livre husi okupasaun invazór Indonézia liu husi opsaun rua hanesan referendum no autonomia ne’ebé mak nasaun Indonézia fó liu husi desizaun polítika Presidente BJ. Habibie ne’ebé, ho intensaun atu fó liberdade bá povu Timor-Leste atu deside nia direitu ukun rasik-aan liu-husi konsulta popular iha loron 30 de Agostu de1999, rezultadu husi konsulta popular ne’e, porsentu boot husi povu Timor-Leste deside eskapa-aan no sees husi invazaun Indonézia hodi hili referendum liu husi votasaun ho porsentu liu 72 resin  no manan dereitu fundamental ba luta libertasaun patria  hodi rai Timor Lorosa’e bele hamriik independente hanesan nasaun sira seluk, depoizde hetan tulun husi Organizasaun Nasoins Unidas (ONU) liu husi United Nation Trantitional in East Timor (UNTAET) atu organiza no lidera tranzitoriamente administrasaun iha Timor-Leste antes Restaurasaun Independénsia hatur.

Hafoin iha loron 20 de Maiu de 2002, Timor-Leste  oficialmente Restaura nia Independénsia hodi sai estadu direitu demokratiku ne’ebéharii ho naran República Democrática de Timor-Leste (RDTL). Nasaun foun ne’ebé mak foin harii no hamriik (New State) hetan apoiu husi nasaun sira seluk (apoiu externa) bá referendum no sai nasaun independente ida ne’e mak  la-iha tan  espasu ba nasaun seluk atu bele okupa tan nasaun ida ne’e.

Problema Identifikadu;

Hanesan estadu ida ne’ebé harii ho sistema demokrasia semi-presidensial, utiliza trias polítika hanesan, Presidente, Governu, no Parlamentu, ho Órgaun Soberanu haat hanesan, Presedénsia da Repúblika, Governu, Parlamentu no Tribunal, Timor-Leste liu husi Governu ne’ebé sai hanesan ezekutádor iha Estadu RDTL toma responsabilidade atu elabora Planu Dezenvolvimentu Nasional ida sai giaun ba Dezenvolvimentu hotu-hotu iha Timor-Leste, ho  nune’e iha oportunidade ne’e governu Timor-Leste, elabora Planu Estratéjiku Dezenvolvimentu Nasional (PEDN, 2011-2030) sai hanesan  Planu Dezenvolvimentu ida mesak hodi bele hadi’a, transforma no dezenvolve aspetu sosial, kultura, ekonomia, seguransa, edukasaun, saúde, agrikultura no seluk tan liu husi instituisaun relevante sira iha governu.

Ajenda 2030 ho nia objetivu atu transforma mundu liu-husi Objetivu Dezenvolvimentu Sustentável (ODS). Objetivu 4 hateten  Garante edukasaun ida inkluzivu no ho kualidade ba ema hotu no promove aprendizajen durante vida tomak. Atu hetan susesu implementasaun Ajenda 2030 no atingir objetivu hirak ne’e presiza dadus ho kualidade ne’ebé aas husi  planu hirak ne’e fó kbiit ba instituisaun ministériu edukasaun hodi bele hamosu tan planu sira seluk relasiona ho realidade iha komunidade nia preokupasaun no nesesidade mak hanesan oinsá bele forma di’ak area rekursu umanu iha futuru nian. Tan ne’e iha politika Ministériu Edukasaun hamosu planu nesesáriu ida atu hadi’a sistema edukasaun atu bele garante kualidade rekursu umanu iha Timor-Leste tanba edukasaun mak hanesan janela prinsipal ida mesak  hodi bele prepara sidadaun sira iha futuru ida ne’ebé mak sai kualifikadu, to’o ona iha ponto de situasaun ida ne’ebé ita tenke muda-an husi períodu nakukun passadu nian (obscurantismo), ne’ebé edukasaun sai nu’udar buat luxu ida ba Timor oan sira.

Ita tenke hanoin katak, too ona tempu, ita jerasaun ida ne’e fó forma foun ida ba perspetiva Edukasaun, katak so edukasaun mak transforma  rekursu umanu ne’ebé di’ak no kualidade, Reflete ba teoria Paul Ferreira katak edukasaun para transformar homem, homem transformar mundo, husi teoria ne’e hateten  katak so edukasaun mak sai hanesan xave importante atu bele transforma ema liu husi dalan edukasaun mak Estadu no governu iha dever no obrigasaun hodi fó oportunidade ba timor oan hotu atu bele asesu ba edukasaun, nune’e bele iha garantia ba sira-nia  moris di’ak iha futuru. Liafuan hirak-ne’e refleksa iha artigu 59. kona bá edukasaun no kultura, iha númeru 2 ne’ebé deskreve “Ema hotu iha direitu hanesan, ba oportunidade atu eskola no ba formasaun serbisu/profisaun nian”. Hanoin ida-ne’e reforsa mós iha númeru 4 ne’ebé deskreve “Estadu tenke garante ba sidadaun hotu-hotu, tuir sira-nia kapasidade, atu bele hetan eskola boot kona-ba investigasaun sientífika no hamoris/haburas arte iha Decreto lei No.14/2008 dia 29 de Outubru hatur ona iha Ministériu Edukasaun Timor-Leste Objetivu prinsipal mak atu regula orientasaun ba dezenvolvimentu Sistema  Edukasaun, iha artigu 1 aliña 4 fundamentar katak estadu garante no asegura posibilidade profesór/a ne’ebé kualifikadu no adekuadu, infraestrutura, meius finanseiru  ne’ebé nesesáriu atu garante ba edukasaun ida ne’ebé mak kualidade.

Plano estratéjiku edukasaun ne’ebépublika husi Ministru Edukasaun iha vizaun katak 2011-2030 edukasaun sei adekuadu iha koñesimentu kualifikadu mais produtivu no valor ba sidadaun hotu asesu ba edukasaun atu bele fó biban ba partisipa iha prosesu dezenvolvimentu ne’ebé inkluzaun no unidade nasional. Tamba Edukasaun mós hanesan pilar importante ida iha area dezenvolvimentu nasional ne’ebé tenke toma atensaun atu nune’e bele alkansa objetivu nasaun nian bá sidadaun hotu iha justisa no moris di’ak.  Pergunta ba ita hotu to’o ne’ebé mak,  ona planu estratéjiku edukasaun 20011-2030,  segundu política estratégia saida mak governu uza durante iha mandatu. Husi preokupasaun ne’e mak hakerek na’in lori ita atu bele buka hatene, realidade Timor-Leste,  planu estratéjiku dezenvolvimentu Nasional hela de’it 10 anos para atu kompleta ona maibé kualidade edukasaun ate agora sai problema ba populasaun sira, investimentu setor Edukasaun seidauk la’o di’ak ba alokasaun Orsamentu la to’o 20 % maibé menus husi 5% kualidade infraestrutura sei la’o Hakdasak, koloka profesór sira seidauk tuir nia méritu, númeru estudante 60 pessoa kada aula ida, menus  ekipamentu ba ema defisiénsia atu kapasita an iha vida moris, ida ne’e mak sai sasukat mak edukasaun iha Timor- Leste seidauk garante ba kualidade, iha planu ida ne’e ita konsidera katak indiretamente fó hela impaktu dezenvolvimentu kualidade edukasaun iha Timor Leste.

Abordajen Artigu husi Lospalos news: 28,06,2017 ho titulu “Saida maka hu’un hosi kualidade Edukasaun Timor Leste nian ne’ebe ki’ik tebes? ǁ OPINIAUN”

Padraun, Kurríkulu ho Kualidade

Padraun ho kurríkulu sai parámetru di’ak ida hodi sukat kualidade edukasaun. Tanba padraun ho kurríkulu iha eskola mak sei sai mata dalan ba prosesu hanorin ho aprende, no sai sasukat ba ema ida hodi hakotu nia kursu. Padraun ho kurríkulu normalmente dezenvolve husi filozofia ho objetivu estadu nian ne’ebe transforma iha planu estratéjiku dezenvolvimentu nasional hodi lori ema ba ne’ebé,  sai saida no halo saida iha nasaun ka sosiedade ida, iha sekuénsia tempu. Bainhira liga padraun, kurríkulu ho kualidade edukasaun, iha persesaun variativu entre matenek na’in sira kona ba kualidade edukasaun. Katak sasukat kualidade edukasaun iha nasaun ka sosiedade ida la hanesan ho nasaun ka sosiedade seluk.

Tanba padraun ho kurríkulu edukasaun tenke fundamentaliza  iha filozofia, objetivu moris ho demanda husi nasaun ka sosiedade ida-idak nian. Nune’e padraun ho kurríkulu iha Timor-Leste seidauk klaru hodi liga didi’ak ho filozofia, objetivu ho demanda estadu nian. Tanba padraun ho kurríkulu ne’ebé aplika iha ne’e barak liu kopia ho kompila husi nasaun sira seluk nian.

Nune’e kursu ne’ebé hanesan dala barak nia kurríkulu variativu iha eskola sira. Ambiguitas formula padraun ho kurríkulu ne’e mos mosu husi inklareza define kualidade edukasaun iha Timor-Leste.Too agora, Timor-Leste mos seidauk iha sasukat ba kualidade edukasaun. Katak kualidade ida ki’ik ne’e nia sasukat mak saida? Ka kualidade edukasaun ida di’ak ne’e mak oinsá? Bainhira define ona sasukat klaru, maka foin formula kurríkulu hodi hatutan prosesu tomak hodi hanorin ho aprende no hodi alkansa kualidade edukasaun ne’e.

Iha kontestu ne’e, ema balu sukat kualidade edukasaun via parámetru rua. Ida, eskola ka instituisaun ensinu superior ida atrai estudante barak (input demand), no output husi eskola ka instituisaun ensinu superior ida absorve makas iha merkadu servisu (output demand). Seraque uza sasukat ne’e, entaun eskola ho instituisaun ensinu superior barak kualidade di’ak ona.

Tanba eskola barak inklui mos universidade sira simu estudante barak, no nia alumni mos barak mak hetan ona servisu.Maibé sekarik kualidade edukasaun sukat husi koñesimentu (knowledge), abilidade téknika (skills), valor moral ho etika (values) ho hahalok (attitudes), entaun kualidade edukasaun iha Timor-Leste seidauk di’ak. Tanba output husi eskola barak mak nia koñesimentu seidauk kle’an, abilidade téknika sei fraku, etika ho moral no hahalok di’ak sei menus.

Tanba ne’e, ita hare kompetetividade output eskola sira iha Timor-Leste sei ki’ik. Nia implikasaun mak ignoránsia ba kultura ho identidade lokal (“kopia kultura liur ho hakribi ita nia an”), degradasaun moral (prostituisaun, aborsi, divorsia, sex bebas, sex diluar nikah, traisaun moris monogamia, violénsia doméstika, droga, sarkasme, violénsia, ho krime omisídiu Saé makas), “intoleránsia ba pluralisme ideia ho opsaun”, tendénsia korrupsaun, krime fase osan (money laundry), desizaun politika dala barak la serve ba interese komún(common good), figura públiku bosok matak-matak ho seluk-seluk tan.Lian hanorin sai problema boot iha Timor-Leste. Iha Konstituisaun RDTL Artigu 13 hato’o katak lian ofisial mak Tetun ho Portugés.

Nune’e mos Lei Baze Edukasaun artikula katak lian hanorin mak Tetun ho Portugés. Governu prefere liu uza Portugés hanesan lian hanorin. Tanba ne’e, desde tinan 2000 UNTAET/ETTA ho Governu Timor-Leste investe makas iha Portugés hodi hanorin. Maibé realidade hatudu oin seluk. Mestre sira hamutuk 11,000 iha Timor-Leste, 7000 (64%) la hatene Portugés. Mestre sira hatene Portugés ne’e (36%) mos nia nivel profisiénsia seidauk hatene loos (Dr. Bendito Freitas, Ministru Edukasaun sita iha STL, Juñu 2013).  Tanba ne’e, ita la hakfodak, mestre sira sei hanorin ho bahasa Indonesia ho Tetun, maski lia rua ne’e, ida “phasing out” ona, no seluk la hanorin sistemátiku iha ensinu báziku ho sekundáriu.Konsekuénsia ninian mak estudante la hatene lian ida di’ak. Tanba mestre barak mos la hatene lian ida di’ak.

Estudu husi Sentru Estudu Linguístika DIT (2012) hatudu nivel profisiénsia lian estudante hotu la too hodi estudu iha ensinu superior. Ne’e implika tebes ba kualidade edukasaun. Tanba bainhira mestre ho estudante sira la domina di’ak lian ida hodi hanorin ho aprende, sei fó impaktu boot tebes ba kualidade hanorin ho aprende. Tanba prosesu transferénsia konteúdu siénsia la efetivu (Qorro, 2006 ho Kinyaduka ho Kiwara).Tanba lian hanorin hanesan pipa ida hodi hasuli bee husi ponta (ujung) ida ba ponta seluk. Bainhira pipa la di’ak ka intupidu, sei halo bee la suli ba ponta seluk (Qorro, 2006). Nune’e bainhira mestre ho estudante la domina lian ida hodi hanorin sei susar tebes transfere matenek ka konteúdu siénsia ba ema seluk. Ida ne’e afeta tebes kualidade edukasaun.

Rekrutamentu ho Promosaun Mestre

Kualidade mestre sai importante ne’ebé afeta kualidade edukasaun. Kualidade mestre sukat husi koñesimentu ho abilidade iha area espesializada, pedagogiku, métodu hanorin ho avaliasaun. Mos sukat husi atitude (etika, moral, maneira aprezenta-aan ho abilidade komunikasaun) di’ak hodi hanorin no sai modelu ba estudante aprende no banati tuir. Kualidade mestre ne’ebé di’ak tenke hetan husi prosesu rekrutamentu ida di’ak, ne’ebé bazeia ba koñesimentu kle’an, abilidade aas, iha méritu, etika ho atitude di’ak. Nune’e mos presiza formasaun kontinuadu iha area espesializada, métodu hanorin ho avaliasaun.

Maibé rekrutamentu mestre sira barak la hare ba kualidade ho relevánsia koñesimentu tuir méritu hodi hanorin. Maibé hare liu ba afiliasaun politika ho kolega. Nune’e mestre sira barak mak nia nivel edukasaun ho abilidade ki’ik iha konteúdu siénsia, pedagójika hanorin, hahalok no lian Portugés. Tanba rekrutamentu sadere liu ba konsiderasaun politika, mak mestre sira barak mak sai ativista, lealdade ho devosaun politika barak liu duke hadomi ho leal ba sira nia profisaun “sagradu” hanesan herói boot ba prepara rekursu umanu ho lider nasaun nian ne’ebé la bele limita ho politika partidáriu, grupu, belun ho favoritizmu. Mestre sira tenke kaer metin prinsípiu edukasaun ida ne’ebé universal, egalitarian, fraternal, sein fronteira ka non diskriminativu.

Nune’e mos promosaun ho rejime karreira ba mestre sira hare liu ba abilidade lian Portugés, no ignorante abilidade mestre sira nian iha konteúdu siénsia, pedagójiku ho “soft skills” seluk. Nune’e mestre barak domina area espesializada, maibé tanba de’it la hatene Portugés, sira susar hetan promosaun. Nune’e la estimula mestre sira atu domina area espesializada ne’ebé sira hanorin. Kondisaun ne’e hatodan tan formasaun mestre sira barak liu iha lian Portugés, maibé ignora formasaun kontinuadu iha konteúdu siénsia, pedagojia, téknika hanorin ho avaliasaun. Nune’e transferénsia konteúdu siénsia ba estudante mos ki’ik ne’ebé afeta tebes kualidade edukasaun.

Fasilidade Aprendizajen

Fasilidade hanorin hanesan parte importante ida ne’ebé determina kualidade edukasaun. Fasilidade eskola sira hanesan sala, meja, kadeira, livru, lap, IT, audio-vizuál, be moos ho sanitasaun tulun hamosu ambiente estudu ne’ebé saudável, partisipativu, ho interasaun ativu ho resiprokal entre mestre ho estudante, mestre ho mestre no estudante ho estudante.Maibé iha Timor-Leste, iha eskola barak mak estudante sei tuur iha rai hodi aprende, livru menus hodi posibilita mestre ho estudante sira hanorin ho aprende, falta fasilidade pratika hodi posibilita mestre ho estudante sira aprende ho introdús no uza métodu hanorin ho aprende ne’ebé kaer ho liman (hands on teaching and learning processes).

Tanba falta fasilidade mestre hanorin teoria de’it, sein liga ho pratika ho fenomena riil iha sosiedade, indústria ho merkadu servisu. Nune’e estudante susar imajina ho internalização matéria hanorin. Fasilidade menus la tulun mestre sira hodi hanorin inovativa no la estimula estudante hodi halo kriatividade.Realidade mos hatudu katak iha eskola privadu sira (liu-liu ensinu báziku ho sekundáriu) iha Timor-Leste nia fasilidade di’ak liu.

Nune’e kualidade edukasaun iha eskola privadu sira ne’e mos di’ak liu kompara ho eskola publika sira. Hare ba skor ka valor exame nasional tinan-tinan hatudu estudante sira  ho notas aas mai husi eskola privadu sira, liu-liu eskola katólika. Diverjénsia fasilidade hanorin iha eskola públiku ho privadu, laos de’it hamosu diverjénsia kualidade entre eskola, maibé importante liu hamosu mos diverjénsia iha sosiedade entre povu baibain, kiak no barak (the poor) ho ema riku sira (the have) kona ba asesu no hetan kualidade edukasaun.  Povu maioria ho kiak nia oan sira eskola iha eskola públiku ne’ebé menus fasilidade hanorin.

Kapasidade Jestaun

Kapasidade jestaun eskola di’ak sei tulun hamosu kualidade edukasaun iha eskola ida. Jestaun eskola di’ak sei asegura funsionamentu instituisaun la’o di’ak, efetivu, efikás, ho sustentavel hodi mobiliza rekursu tomak ne’ebé iha hodi atingir meta ho objetivu eskola nian. Maibe  mos bele servisu parseria ho instituisaun ka entidade seluk hodi hetan rekursu ka hamosu oportunidade hodi posibilita agente eskolár sira ne’ebé iha hodi aumenta sira nia kapasidade hodi hanorin di’ak, no hetan resposta di’ak ba sira nia kuriozidade ho kriatividade hodi buka solusaun ba problema, pedagójiku ho sosio-ekonomiku. Nune’e liga ba ita nia realidade edukasaun, Diretór eskola ho nia personel barak mak la iha esperiénsia hodi jere eskola.

Kapasidade jestaun eskola hanesan halo implementa ho avaliasaun  planu eskola, jere staf, estudante ho fasilidade sei menus. Mos limitasaun inisiativa hodi halo ligasaun ho indústria, setór privadu, sosiedade sivíl ho inan-aman estudante hodi hetan rekursu nesesáriu hodi rezolve problema imediata ruma ne’ebé iha, sein hein de’it husi governu.Agora uma kakuluk ida koak, ka karteira ida aat, diretór eskola sei hein governu too mak hadi’a. Nune’e bele impede prosesu hanorin ne’ebé eventualmente sakrifika kualidade edukasaun. Pur ezemplu, gestor eskola sira bele iha inisiativa halo servisu parseria ho setór privadu, sosiedade sivíl, estudante ho inan-aman estudante hodi hatán problema ki’ik sira hanesan kadeira, uma eskola turu, ho seluk tan.

Dala barak ita hare iha televizaun ka lee iha jornal, diretór eskola ka mestre sira  hasai lia fuan hanesan ne’e, “ami ejize ba governu………., ami husu ba governu………, governu la tau matan………….., ho seluk tan“. Laos sala hodi ezije, maibé importante mos iha inisiativa hodi hare posibilidade ho opsaun balu ne’ebé bele rezolve mesak. Lia fuan sira ejize ne’e hatudu ita hahú monu iha mentalidade fatalismu ka mentalidade dependénsia. Buat hotu ita hein governu. Nune’e mentalidade dependénsia sei transfere ba labarik ka estudante sira, entaun nasaun ne’e bele lakon ema kriativu hodi identifika ho rezolve problema, no nasaun ne’e mos bele lakon kriatividade, produtividade ho kompetetividade hanesan fundamentu hodi kompete ho nasaun sira seluk.Iha limitasaun iha jestaun eskola, diretór eskola ho mestre sira seidauk hetan formasaun kontinuadu hodi hadi’a jestaun eskola.

Nune’e mos inspetór eskola ne’ebé iha no ba eskola, iha kapasidade ho esperiénsia limitadu. Tanba ne’e, sira barak liu ba hare de’it buat ne’ebé sala iha eskola, maibé falta hato’o feedback ba diretór eskola, ho mestre sira hodi hadi’a servisu ne’ebé sala. Nune’e gradualmente ita bele hasai kualidade jestaun eskola ne’ebé ultimamente bele kontribui ba elevasaun kualidade edukasaun.

Partisipasaun Familia

Kualidade edukasaun sei di’ak necessitar mos partisipasaun familia iha prosesu aprende alunu sira nian. Tanba alunu sira nia tempu barak liu iha uma ho sosiedade. Infelizmente vida materialismu ho konsumerisme ohin loron halo familia ida-idak ocupado tebes ba servisu, karreira ho buka osan. Tanba ne’e, tempu hodi devota ho tulun edukasaun labarik nian menus. Ho situasaun ne’e, maski estudante aprende iha eskola, maibé sein tulun husi familia, labarik sira susar iha internalização di’ak matéria sira ne’ebé hetan ona iha eskola.

Hahalok ho moral labarik sira nian di’ak mai husi ambiente familia ho sosiedade ida di’ak. Sein akompañamentu ida di’ak mak kualidade koñesimentu ho moral labarik sira nian sei menus no fasil monu ba influensia negativu ne’ebé dezmoraliza familia ho sosiedade.Vida materialismu ho konsumerisme mos halo familia barak tolera ka la kontrola aktu dezmoralizasaun valor fundamental umana nian hanesan sex komersial (commercial sex), sex bebas (free sex), feen bar-barak (polygamy), la’en bar-barak (polyandry), sex diluar nikah (sex outside marriage), korrupsaun, krime omisídiu ho seluk tan. Buat sira ne’e hotu insentiva ba hamosu kualidade edukasaun.

Mentalidade Edukadór

Mestre sira tenke iha mentalidade edukadór ne’ebé hanorin, sai figura no modelu di’ak ba alunu sira. Mestre sira tenke aprende kontinuadu ho servisu makas hodi fahe matenek ba estudante sira. Realidade hatudu oras ne’e, ita nia mestre sira barak ladún lee, ho prepara matéria “asal jadi”, la tulun estudante komprende matéria ho dezenvolve kapasidade soft skills seluk. Mestre sira barak mos hare profisaun mestre hanesan oportunidade servisu ho “fatin buka osan”, ka oportunidade buka masa hodi satisfás sira nia interese politika. Sira la buka hatene kle’an kona ba profisaun jenuinu nu’udar mestre, no haluha sira nia vokasaun ka panggilan nu’udar eroi boot ba nasaun iha kontestu dezenvolvimentu rekursu umanu, preparasaun lider nasional ho transformasaun sosiedade ba di’ak. Mestre sira dala barak hanoin de’it ejize sira nia direitu no haluha sira nia dever.

Iha prosesu ejize sira nia direitu ne’e, mestre sira balu uza lia fuan sarkasme, insultu (tolok), violentu, diskriminativu, rasizmu, sukuizmu ho agresaun fíziku hodi atingir sira nia interese ka objetivu. Hahalok sira ne’e kondús ho pepatah: “Guru Kencing Berdiri, Murid Kencing Berlari”. Hahalok sira ne’e transfere ba estudante mak sei destrui hanoin, mentalidade, hahalok estudante nian. Iha ne’e mak ita hahú hamosu embrio hodi destrui kualidade rekursu umanu, ho dezmoraliza sosiedade Timor-Leste. Kualidade edukasaun iha Timor-Leste hahú reduzidu.

La iha Konsensu Nasional

Timor-Leste seidauk iha konsensu nasional ba edukasaun. Tanba ne’e edukasaun jere parsial ho partidáriu. Nune’e ita la hafodak bainhira troka governu ka ministru foun buka dezmonta sistema edukasaun ka troka ema ne’ebé iha, sein hare nesesidade, urjénsia, efetividade, profesionalisme ho méritu. Dezmonta sistema edukasaun nasional ne’ebé la bazeia ba quality and effective based outputs no orienta liu ba political affiliation and groupbased approaches sei halo servisu iha edukasaun la efetivu no sakrifika kualidade.

Iha nasaun post-konflitu no menus rekursu umanu, kestaun sira hanesan edukasaun, saúde ho jestaun rendimentu nasional hanesan kestaun boot no estratéjiku ne’ebé tenke hetan konsensu nasional no partisipasaun husi entidade hotu hodi jere. Tanba setór sira ne’e mak bele estimula transformasaun nasaun ho sosiedade ba di’ak, estavel, demokrátika ho prósperu.

Kualidade edukasaun, saúde ho jestaun rendimentu estadu la di’ak sei afeta tebes estabilidade, kompetividade ho sustentabilidade nasaun ida nian.Nune’e Timor-Leste tenke iha konsensu nasional kona ba edukasaun. Katak edukasaun ne’e la iha fronteira. Nune’e edukasaun tenke jere ho hala’o inkluzivu ho interpartidariu, suku, grupu, ho non-diskriminatóriu hodi orienta ba kualidade, efetivu, méritu ho profesionalisme

 Ho hanoin hanesan ne’e mak bele monta sistema edukasaun ida ne’ebé iha vizaun, misaun ho objetivu klaru (clear), bele alkansa (achievable), bele sukat (measurable), konsistenti(consistent), relevante (relevant), bele ajusta tuir tempu (adjustable), bele asesu(accessible) ho afordavel (affordable)  hodi lori Timor oan atu ba ne’ebé, sai saida no halo saida iha tinan hirak mai ne’e. Méritu ho profesionalisme mak sai Save ba inklusividade jestaun edukasaun.Bainhira hetan ona konsensu komún ona, foin ita dezenvolve estratégia hodi alkansa vizaun, misaun ho objetivu sira ne’e.

Ho hanoin hanesan ne’e mak bele halibur kuadru kualifikadu ho profisionál nasaun nian hodi tau hanoin hamutuk hodi set up padraun edukasaun no formula estrategia efetivu ho relevante hodi hametin sistema edukasaun no dudu ba kualidade. Mos tulun implementa sistema edukasaun ida di’ak, efetivu, relevante ho sustentavel ba interese hametin kompriensivu timor oan nia kualidade, kompetividade, fiar no identidade iha mundu kompetetivu ho globalizeda.

Falta Investimentu Governu

Kualidade edukasaun simétriku ho kualidade kurríkulu, mestre, lian hanorin, fasilidade, métodu hanorin ho avaliasaun, jestaun eskola ho ligasaun ho indústria ho merkadu servisu. Parámetru sira ne’e iha relasaun koeziva mos ho investimentu ka osan. La iha osan ka investimentu, kualidade edukasaun sei sa’e neineik tebes ka estagnado.Hare ba orsamentu anuál estadu nian ba setór edukasaun tinan-tinan ki’ik tebes ka la too 10%.

Iha parte seluk, problema iha setór edukasaun boot no grave tebes ne’ebé presiza hadi’a imediata hodi asegura kualidade. Orsamentu governu Timor-Leste ba edukasaun k’iik (la too 10%) no la komparavel ho alokasaun orsamentu governu ba edukasaun iha nasaun seluk hanesan Indonesia (20%), Tailándia (25%) no rekomendasaun UNESCO (26%). Maski nasaun sira ne’e nia infraestrutura bázika eskolár di’ak liu Timor-Leste.Ho alokasaun orsamentu ida ki’ik, kualidade edukasaun sei ki’ik nafatin. Maski ita bele troka ministru tun sa’e, no bele lori ministru edukasaun husi Amerika ka Australia hodi sai fali ministru edukasaun iha TL.

Kualidade edukasaun hanesan prosesu ida ne’ebé simétrika ho konsisténsia investimentu iha tempu naruk.Maibé importante mos investimentu iha edukasaun tenke simétrika ho jestaun di’ak. Nune’e ema sira jere, kaer ho implementa projetu edukasaun tenke hakore an husi interese politika partidáriu, grupu ho favoritizmu. Investimentu ba projetu edukasaun tenke orienta ba objetivu ida klaru hodi hasae kualidade edukasaun via dalang ne’ebé efetivu. Nune’e mos kapabilidade profesional ho méritu sei sai fator determinante ema nian ba susesu implementasaun investimentu iha setór edukasaun.

Alternativa Simples;

• Atu garante edukasaun ne’ebé mak kualidade hodi prepara rekursu ba jerasaun futuru atu transformasaun dezenvolvimentu nasaun mak governu sira tenke iha política públika ne’e mak di’ak, iha sorin seluk mos alokasaun orsamentu ba dezenvolvimentu setór edukasaun másimu 21% husi Orsamentu geral do estado.
• Hari no hadi’a fasilidade eskola sira ne’ebé mak iha territóriu laran tomak ba edukasaun hirak ho karakter labarik, defisiénsia no sensitivu-jéneru no fornese ambiente aprendizajen ne’ebé seguru, la-violentu, inkluzivu no efetivu ba ema hotu.
• Hadi’a jestaun iha eskola husi nivel primáriu to’o sekundáriu atu bele garante efisiente no efikás iha instituisaun refere.
• Koloka profesór sira ne’ebé tenke tuir nia méritu, reforma ona profesór sira ne’ebé mak idade tama ona ba 60 anos. Rekruta fali profesór sira ne’ebé idade produtividade atu bele fahe siénsia ba estudante sira.
• Diminui estudante sira kada aula ida mínimu 30 másimu 40 atu nune’e fasilmente profesór/a sira bele kontrola ho di’ak.
• Atu garante kualidade edukasaun iha timor leste ba timor oan hotu mak pontu hirak ne’ebé hakerek na’in sita ona iha  alternativu mak governu tenke hare sériu ba problema ida ne’e hodi hamosu política estratéjia ida ne’ebé di’ak atu alkansa ba vizaun futuru  kualidade edukasaun iha timor leste.

Hakerek Na’in: Maubere Anopen