Lafaek News—Dadeersan sei falun metin balada fuik sira sei hananu iha ai-leten, avó Rosa sai ona husi um aba merkadu Taibesi hodi sosa produtu local hirak hanesan ai-dila funan, liis mean, mostarda hodi fan tutan fila-fali ho lao ain haleu sidade Dili.
Rosa ho nia idade 65, la merese ona atu hala’o atividade liu-liu servisu todan, maibé problema ekonomia iha uma laran la sufisiente obriga avó Rosa tenke hakulu bote ne’ebe hakonu ho modo no ka’er mos iha liman rua hodi lao hadulas sidade Dili nia laran husi dadeer too kalan fila ba uma.
Rendimentu loron ida sorte di’ak bele hetan osan dolar 5 too dolar 6, iha sorte at loron ida ema sosa de’it modo futun ida ne’ebe ho presu sentvus 50, dala ruma mos ema la sosan, rendimentu ne’ebe avo Rosa hetan liu husi tutur bote la’o iha rai manas laran too kalan hodi sustenta ekonomia uma laran no selu oan nia eskola.
Rosa Martins da Silva, ho idade 65 ne’e hela iha aldeia Bee Kuse, postu administrativu Vera Cruz, Munisipíu Dili, ne’ebé kada loron sempre leba modo tahan hodi fan la’o hale’u sidade Dili buka osan hodi sustenta familia uma laran no oan sira ba eskola,
“Modo ne’e ha’u sosa tutan iha merkadu Taibesi depois mak ha’u faan tutan sorte di’ak dader to’o kalan bele hetan to’o $5 dolar, maibé sorte aat hetan $3 dolar de’it hanesan ne’e, entaun ba uma mak fos la iha entaun osan la to’o atu sosa fos no modo sira,” katak Rosa Martins da Silva ba lafaek news iha Kolmera foin lalais ne’e.
Durante tempu naruk Rosa fan modo ne’e, liafuan ne’ebé Rosa nunka tenik sai husi ibu mak kolen, tanba ho hanoin ida katak, “see sente kolen se loos mak buka osan hodi sustenta nesesidade uma laran no oan sira eskola.
Avó Rosa obriga an leba modo hodi la’o haleu sidade ne’e, tanba nia kaben afeta moras iha tinan 2000, no idade mós avansadu liu 74 no labele halo serbisu hanesan buka osan no ba da-daun kondisaun moras toba de’it iha uma, obrigatoriamente Rosa tenke asume papél rua, xefe familia no Dona da Casa buka osan hodi sustenta uma laran,
“Uluk sente Kaman tanba nia laen sei kondisaun di’ak ne’ebé dalaruma buka serbisu hodi sustenta uma laran maibé agora ha’u nia la’em moras nomos idade avansadu ona entaun ha’u mak tenke buka osan sustenta uma laran, ”dehan Rosa Martins Martins da Silva.
Inan Rosa ne’e ho nia kaben kous oan hamutuk mane na’in tolu, rua eskola hela iha banku sekundária no ida seluk to’o de’it primaria deside an sai husi eskola hodi ajuda nia papa no mama tanba nia aman ho kondisaun moras hela iha uma.
Jornallista : Egidio Nono
Editora : Nelya Barros
