Lafaek News—Servidór foinsa’e husi Youth of The Streets Overseas Relief Fund servisu hamutuk ho Fundasaun Forum Komunikasaun Juventude (F-FCJ) Oratóriu Dom-Bosco, apoiu bola 6 ba uma mahon Minguel Magone hodi anima labarik sira inklui ema boot hodi hasees sira husi traumatizasaun.
“Ajuda ne’e atu anima labarik sira iha uma mahon, máka bola volley ball rua bola kaki ba labarik ki’ik no ema bo’ot basketball ida no badminton raket ida 1, labarik sira hodi halimar,” dehan Servidor Foinsa’e, Cipriano Neves, ba lafaek news iha uma mahon Minguel Magone Balide, kinta-feira (13/05/2021).
Servidór foin sa’e ne’e sente orgullu ho responsavel sira iha uma mahon, tanba bele tau matan ba labarik sira no halo sira kontente liután nune’e sira hodi haluha tiha saida maka akontese ba sira.
“Ami kontente tebes tanba maun no mana sira bele tau matan no anima labarik sira, hodi labele hanoin saida máka sira hetan no akontese ba sira, tan ne’e ami nafatin esforsu servisu hamutuk ho Fundasaun Forum Komunikasaun Juventude (F-FCJ) Oratóriu Dom-Bosco, ba oin bele koopera hamutuk ajuda alin sira di’ak liu tan,” nia informa.
Iha sorin seluk, reprezentante Divizaun Selter, Juliana Maria Freitas, subliña apoiu ida ne’e atu halo kontente ba labarik sira labele la’o sai ba liur maibé hakmatek iha laran, no haluah saida máka antes ne’e sira hasoru.
“Ami agradese ba sira no mós ami sei halo planu atu husu ekipamentu seluk ne’ebé máka labarik sira pressiza hodi sira fó apoiu nafatin tanba iha situasaun hanesan ne’e sira la eskola entaun halo oinsa para sira bele kontenti no hakmatek,” nia hakotu.
Entretantu, labarik sira iha uma Mahon Minguel Magone kompostu husi feto no mane hamutuk nain 40 husi ki’ik to’o bot, tan ne’e F-FCJ Oratóriu Dom Bosco koopera ho Youht Off the streets Overseas relief fund, hodi bele anima ba labarik sira.
Jornalista : Aniceto Dias
Asisten Editór : Pedro de Almeida