Nesesidade ne’ebe SEPS distribui hanesan foos, supermi, mina inklui material dapur nian.
Lafaek News—Governu liu husi Sekretariu Estadu Protesaun Sivil (SEPS), sábadu (17/04), distribui apoiu umanitária ba vítima inundasaun husi aldeia 12 de Outubro suku Komoro iha uma adat Tasi-tolu hamutuk 1.760.
“Apoiu ne’e hanesan apoiu ida ne’ebé bele komesa kontinua ita nia moris loro-loron nian tanba iha Tasi-tolu sai hanesan sentru ida ne’ebé afeta makaas, ita haree katak uma barak iha nebá sei labele hela tan ona no sei hein desizaun governu nian oinsa mak bele rezolve sira hanesan labarik ferik katuas oinsa mak bele evakua husi nebá depois mak ita servisu hamutuk ho ita nia xefi suku, xefi aldeia hodi rekolla dadus, até ohin halo distribuisaun” dehan SEPS Joaquim José Gusmão ba Jornalista sira iha Tasi-tolu uma adat Dili, sabadu (17/04/21).
Joaquim José Gusmão, hateten governu liu husi protesaun sivil apoiu ofisiál tuir padaraun polítika nasionál dezastre nian ne’ebé fó hela servisu ba protesaun sivil atu hala’o, tan ne’e sasan sira ne’e fahe ba rua, ida mak hahan no ida mak la’os hahan, hahán mak hanesan foos, bimoli, susuben no seluk tan, ida fali la’os hahan mak hanesan sanan, taxu, bikan, kanuru ka materiál dapur sira seluk.
“Apoiu tomak husi ita parseiru sira hanesan embaixada sira, ajénsia espesializadus ONU nian, NGO internasionál sira, husi Setór privadu sira ne’ebé fo tuir ita nia sentru operasaun husi dezastre naturais nian ne’ebé situadu iha ita nia protesaun sivil,” Nia Informa.
Dadus provizóriu ne’ebe SEPS rekoilla, vítima Inundasaun iha Aldeia 12 de outubro Suku Komoro total 1.760, uma kain maka hetan ona apoiu umanitária husi Sekretariu Estadu Protesaun Sivil.
Jornalista : Juvita dos Santos
Editor : Agapito de Deus
