Lafaek News—Besik fulan ida (1) komunidade Aldeia 12 Outubro, Suku Komoro, Postu Administrativu Dom Aleixo, munisípiu Dili susar ba bee moos, tanba tanki ne’ebé governu oferese hodi ense bee durante semana tolu ona la mai ense.
Aldeia refere ho totál populasaun hosi uma kain 125 hamutuk 587 abitante.
komunidade aldeia 12 Outubru Argentina da Cruz, ba LafaekNews iha loron kuarta (02/12), katak durante estadu emerjénsia sira la susar ba bee moos tanba governu fasilita liuhosi koloka bee fatin espesies hanesan Lona ho kuantidade 10000 litru kada loron 3 mai ense hodi komunidade konsumu.
Maibé ikus-ikus ne’e la mai ense sein informasaun ruma, ho nune’e atu responde ba nesesidade obriga aan tenki sosa kada masa (jergen) sentavus 50.
“Semana tolu ona estadu la lori bee mai, entaun hakarak ka lakohi ami tenki sosa, sosa hosi ema ne’ebé baibain uza karreta tanki mak mai fa’an,” Argentina dehan
Nia rekoñese katak, 10000 litru ne’e mós la to’o tanba kuru bee ne’e mós tenki forma, bainhira to’o sedu entaun di’ak más to’o tarde dala ruma hein to’o bee hotu tanba kadavés uma kain ida ninia jerigen bele to’o 60 ka 70 hanesan ne’e.
Entretantu iha sorin seluk xefe aldeia 12 Outubro Agostinho Gomes hato’o lia hanesan, durante implementasaun estadu emerjénsia governu mai destaka bee fatin (kapa ka Lona) nune’e ense bee hodi komunidade aldeia 12 Outubru bairru João Paulo II kuru.
“Maibé ohin loron la mai ense, ami autoridade mós la hatene, tanba la iha informasaun ruma hodi ami bele hatene, razaun hosi la mai ense bee ba komunidade sira konsumu ne’e tanba saida,” tenik nia
Jornalista : Juvita dos Santos
Editór : Ezequias Tomás
