Lafaek News–Asosiasaun Jornalista Timor lorosa’e (AJTL), afirma Komemorasaun loron nasional liberdade imprensa iha Balibo AJTL kontinua husu ba estadu, governu, partidu politiku no instituisaun importante sira kontinua respeita serbisu jornalista hodi evita kriminalizasaun atu haklaken lian los ho lolos ba povu tomak.
“Ohin loron dahuluk nian ita komemora loron nasional liberdade imprensa iha Balibo AJTL kontinua husu ba estadu, governu, partidu politiku no instituisaun importante sira seluk hodi kontinua respeita serbisu jornalista nian, labele kriminaliza serbisu jornalista nian hodi uza kódigu penal tanba jornalista iha papel importante hodi sai ponte ba entre povu ho estadu hodi informa informasaun sira ne’ebe povu sira hakarak hato’o, no sai kontrolu social iha sosiedade nia leet”, dehan Prezidente Asosiasaun Jornalista Timor lorosa’e ( AJTL) Zevonia Vieira hafoin realiza komunikadu imprensa iha Balibo, Domingo (16/10/2022).
Presidente AJTL Zevonia, informa tan katak, Liuhusi komemorasaun ne’e AJTL kontinua hato’o nia pozisaun katak hahú husi haril AJTL iha 22 loron 22 Dezembru 1999 to’o ohin loron AJTL kontinua firme hodi promove liberdade imprensa no espresaun iha Timor-Leste, tanba ida ne’e mak sai baze fundamental husi direitu umanus.
“AJTL orgullu tanba relatóriu husi Report Without Borders Timor-Leste nia liberdade imprensa kontinua hatudu ezemplu di’ak iha sudeste aziátiku ho rangking 1 no iha mundu global kontinua hakat ba rangking 17”, esplika Portavoz ne’e.
Entretantu loron 16 fulan Outubro tinan 2022 nu’udar loron dahuluk nian hodi komemora loron nasional liberdade imprensa iha Balibo tanba fatin ne’e nu’udar fatin trajedia ne’ebe militár Indonesia oho jornalista estranjeiru nain 5, nune’e bolu ho naran Balibo Five, liuhusi diskusaun naran hamutuk ho Konsellu Imprensa( KI) hodi deside loron 16 Outubru sai nu’udar loron nasional ba liberdade imprensa
Jornalista : Rita Moniz
Editór : Agapito de Deus
