Lafaek News—Sekretáriu Gerál Organizasaun Nasaun Unidas (ONU), António Guterres deklara katak, ONU hamutuk ho povu Timor-Leste (TL) hodi luta ba independénsia no Luta Ba Dezenvolvimentu ne’ebe ohin loron Timo-Leste hetan ninia Independensia ba ukun Rasik an.
Sekretariu Jerál ONU Antonio Guterres hateten, Timor Leste Luta no mana batalha Independensia ba Ukun Rasik An, ho ida ne’e Sekretariu Jerál orgulho Nasaun Unidos hamutuk ho povu Timor-Leste hodi luta ba independensia sai nasaun demokrátiku.
“Timor-Leste manán batalla independénsia, manán batalla demokrasia hanesan Sekretáriu-Jerál Nasaun Unidas nian, ha’u naturalmente sente orgullu katak, Nasaun Unidas hamriik ona hamutuk ho Estadu no povu Timor-Leste iha luta bá independénsia no iha konsolidasaun demokrasia, maibé Timor-Leste ohin loron tenke manán batalla dezenvolvimentu,” dehan António Guterres haosru malu PM Timor Leste iha palasio do Governu, loron 29/08/2024
António Guterres mós espresa sentidu emosionadu omenajen bá Primeiru-Ministru, Kay Rala Xanana Gusmão nu’udár kombatente no líder rezisténsia ne’ebé sakrifika buat hotu iha ai-laran hodi bele alkansa independénsia nasaun ho nia povu.
Líder mundiál ne’e dehan, rezisténsia ne’ebé Xanana Gusmão hatudu to’o sai dadur iha Cipinang Indonézia, sempre mai ho asaun no determinasaun boot atu defende ninia povu bá independénsia, alende Ida ne’e mos Sekretariu Jerál ONU, konta tuir momentu ne’ebe ko’alia bá Xanana Gusmão via telefónika iha momentu ne’ebé sira na’in-rua iha ona vizaun ne’ebé hanesan entre grupu rezisténsia timorense nian, lideradu husi Xanana Gusmão no Governu Português iha negosiasaun ne’ebé ikus mai la’o hamutuk ho objetivu ida ne’ebe prosesu auto determinasaun iha Timor Leste nian
Sekretáriu Jerál ONU ne’e rekoñese Xanana Gusmão nu’udár líder transformadór ne’ebé transforma Timor-Leste sai hanesan país independente, país demokrátiku, país respeitadór direitus umanus no país ne’ebé iha influénsia internasionalmente.
Signifika, Nasaun Unidas iha ninia limitasaun kapasidade, maibé ho empeñamentu totál, inteiramente ONU hamutuk ho Governu Timor-Leste, no tuir duni estratéjia Governu Timor-Leste nian hodi bele apoia vitória batalla dezenvolvimentu.
“Ha’u sente impresionadu tebes kona-bá deskrisaun ne’ebé Primeiru-Ministru halo liga ho esforsu renovadu liu-liu bá matéria seguransa alimentár liu-hosi investimentu iha seitór agrikultura. Klaru katak, ida-ne’e sai hanesan dezafiu krusiál ida iha êxitu estratéjia dezenvolvimentu,” nia hateten.
Nia mós impresionadu ho kompromissu ne’ebé espresa hosi Primeiru-Ministru Xanana Gusmão liga ho asuntu edukasaun no saúde, ne’ebé interesante tebes ho vizaun kona-bá infraestrutura inklui kapasidade atu hili no deside saida mak povu ne’e tenke halo.
“Ha’u sente impresionadu ho realidade katak Timor-Leste nu’udár Estadu kiik, Portugál mós Estadu kiik, ne’ebé iha kapasidade espertu no rekoñesidu internasionalmente no presiza tebes atu defende,” Sekretáriu Jerál ONU ne’e hatutan.
Timor-Leste hanesan mós membru Organizasaun Mundiál Komérsiu (OMK), nu’udár fundadór G7+ ho influénsia ne’ebé mak boot iha diskusaun nível komunidade internasionál Nasaun Unidas nian, Timor-Leste sei sai hanesan membru ASEAN, iha ne’ebé António Guterres espresa katak bele iha influénsia ho papél importante ida bá populasaun iha Myanmar.
Jornalista : Aniceto Dias
Editor : Agapito de Deus
