Lafaek News-Diretora Jerál Servisu Saúde, Ministériu Saúde (MS), Odete da Silva Viegas, informa, tuir planu ai-moruk vasinasaun Covid-19 ho tipu AstraZeneca hamutuk Dozes hamutuk rihun 24 sei too iha Segunda Semana oin, (05/04/2021).
Tuir nia katak, vasina AstraZeneca neebé sei too iha segunda semana oin nee liuhosi prosesu naruk no prosesu hirak nee hotu hetan aprovasaun hosi Konsellu Ministru, tanba nee sei too mai fó uluk prioridade ba ekipa liña frente sira molok halo vasinasaun ba populasaun tomak.
Vasina neebé mak mai nee ho montante 24 mill no sei prioridade liu mak liña frente sira mak sei hetan uluk vasina refere. Hanesan PNTL, F-FDTL, Saúde, Mídia, Imigrasaun, ALFÁNDEGA, inkluí ema sira ne’ebé moras, nomós ema sira ne’ebé ho idade mais 60.
“Ha’u espera katak ho 24 mill nee bele kobre ona pesoál liña frente balun, dehan Diretora Jerál Saúde hafoin partisipa atividade hand over fatin SAMES,” Odete informa ba Jornalista sira, iha Kampung Alor, Dili, 01/04/2021
Hodi hatutan, tuir planu no preparasaun ba programa atividade neen (6) neebé mak MS halo molok fó vasina mak hanesan, advokásia, enumerasaun kona-ba dadus iha territóriu laran tomak, no korente malirin, depois atividade seluk mak reasaun adverse no ikus liu mak monitorizasaun avaliasaun.
Preparasaun Ministériu Saúde halo ona. Baibain hau mensiona ida mak advokásia, tuir mai mak enumerasaun atu hatene dadus hotu iha terrióriu tomak, monitorizasaun avaliasaun, reasaun adverse, terseiru mak ita halo suporta apoiu hosi UNICEF ba iha SAMES atu apoiu ita-nia korente malirin atu nunee sasán sira too mai inkluí vasina neebé mak too mai ita bele rai iha cool box SAMES nian, depois mak sei distribui ba minisípiu hotu, nia afirma.
Nia dehan, preparasaun ba simu vasina neebé mak sei too mai iha segunda semana oin nee ekipa advokásia mak sei prepara hodi simu materiál sira ne’e iha aeroportu internasionál Nicolau Lobato, Dili.
Jornalista : Egidio Nono
Editór : Lino Aparicio
