Lafaek News—Polísia Nasionál Timor Leste (PNTL), munisípiu Dili, kinta (01/04/21), kaptura adeptus jogu manu-futun nain tolu tanba hela besik fatin ba jogu manu-futun iha Kulu-hun inklui prende motorizadas 25 ho manu 20.
Segundu Komandante Munisipiu Dili (KMD), Superintendente Polísia Euclides Belo, klarifika liu husi konferénsia imprensa iha Kaikoli kinta (01/04/21), katak sidadaun nain tolu ne’ebé polísia kaptura tanba hela besik fatin jogu manu-futun fatin.
“Se mak hela besik iha ne’eba PNTL kaptura depois halo identifikasaun dehan sira-nia uma besik loos iha fatin manu futun, maibé sira nain tolu ne’e manu moris ho manu mate ida mos laiha tanba ne’e ami sei husik fali sira,” dehan Euclides Belo.
Iha protollu ne’e PNTL prende motorizadas 25 iha duni fatin jogu manu-futun ne’e, maibé motor nain mai la lori dokumentus konsidera ilegal, no motor hirak ne’e ninia nain sira mak komete jogu futu manu ne’e.
“Atu hatene autor ba jogu ne’e ami hein hela motorizada nain sira kuandu mai reklama motor ne’e sira nian entaun halo kedas investigasaun maibé motorizada nain ne’ebé mai foti motor tenke lori ho dokumentu motor nian, manu sira ne’ebé mak iha ne’e ita koordena ona ho prokuradór munisipiu Dili hein orientasaun via telefone katak manu sira ne’e atu fo ba se tanba ne’e PNTL sei hein orientasaun husi prokuradór,” Euclides fundamenta.
Entretantu, Anselmos Bere Mau, ne’ebé PNTL kaptura iha jogu refere haktuir nia ho nia kolega na’in rua seluk ne’ebé polísia kaptura, haree hela jogu manu futun ne’ebé rame tebes, maibé derepente polísia kaptura sira nain tolu tanba deskonfia involve iha jogu ne’e, maibé la konsege tama sela.
“Ami haree futu manu ne’e sente gostu maibé atu taru fali osan ne’e, ami nia osan la iha entaun ohin polísia ba kaptura ami maibé la konsege tama sela tanba ami la sala,” Dehan Anselmo ba Jornaliata iha Komandu PNTL Munisípiu Dili kaikoli.
Anselmos haktuir katak autor sira ne’ebé lori manu mai futu ne’e kuaze mai husi bairu seluk, entaun nia labele hatene no koñese diak ema hirak ne’e tanba nia (Anselmo) haree manu futu ne’e husi dook de’it.
“Ema sira ne’ebe ohin futu manu ne’e ami la koñese maibé karik polísia sira atu kaptura bele haree deit ba sira nia evidenaia hanesan motorizada ne’ebe polísia foti ona tanba aira nia dokumentu kompletu,” vítima ne’e reafirma.
Vítima ne’e konta katak sira nain tolu haree ema futu manu iha nia uma leet, derepente polísia too iha fatin jogu ne’e ema sira ne’ebé futu manu ne’e halai namkari hotu, depois polísia kaer sira nain tolu lori ba Kaikoli, tanba la halai husi fatin jogu ne’e, maibé motorizada hamutuk 25, ho manu 20, mate 7 kanek 2 no moris kondisaun baibain 11 lori hotu ba komandu munisípiu Dili hodi submeter ba prosesu legal.
Jornaliata : Orlando Magno
Editora : Nelya Barros
