Lafaek News—Sekretariu Estadu Formasaun Professional no Empregu (SEFOPE), liuhusi Diresaun Nasional Empregu Exterior (DNEE), hala’o enkontru ho empregadór Japaun kona-ba formasaun no traballadór.
“Ha’u hanoin pontu primeiru ita estabelese amigu ida ho sentru Tibar, tanba antes ne’e sira halo ona amigu ho ida ne’e, maibé ohin sira mosu mai iha fatin ida ne’e atu hatete katak, ita presiza haree fila fali amigu ne’ebé mak iha tanba joventude Timor-oan ne’ebé mak atu ba servisu iha Japaun ka Korea, tenki iha kondisaun ne’ebé diak entre nasaun ho nasaun”. Katak Sekretariu Estadu SEFOPE, Rogeiro Araujo Mendonça, ba jornalista sira iha Sefope Kaikoli.
Governante afirma, esforsu ba oin ami sei ko’alia nafain, la’os ohin de’it, maibé sei hasoru malu fila-fali ho Embaixada Japaun hodi ko’alia kona-ba servisu traballadóres migrasaun husi fatin ida ba fatin seluk.
“Ita tenki haree mós kondisaun, tanba ita bo’ot sira hatene katak traballadore barak ba servisu iha ne’eba la seguru, tanba politika governu ida ne’e hakarak redus dezempregu iha rai laran, “Hau hanoin ita ko’alia kona-ba Emi-Ion, ida ne’ebé mak ita atu halo, primeiru ita nia rekomendasaun ba ekipa ne’ebé ohin ami ko’alia iha fatin ida ne’e, atu nune’e ita tenki fó lai formasaun ba joven sira ne’ebé mak agora dau-daun iha Timor ne’e, tanba kultura entre nasaun Japaun ho Timor-Leste la hanesan, tanba ema nia kultura ne’ebé mak agora iha Japaun ema nian avansadu tebes, tanba ne’e ho Timoroan sira ne’ebé mak agora dau-daun servisu iha Timor ne’e, ita bo’ot sira hatene balu ne’ebé servisu la to’o oras lao sai hodi fuma, I balu la tuir oras servisu, ida ne’e oinsá ita bele kria kondisaun ida ne’ebé diak hodi fó formasaun ne’ebé diak ba joven sira, atu nune’e ba servisu iha n’’eba sira lori nasaun nia naran la’os lori ema ida nia naran”, Rogeiro akresenta.
Governante ne’e husu juventude sira ne’ebé dau-daun halo preparasaun atu ba ne’e Korea tenki kontaktu fila fali ho diretór jerál hodi ko’alia kona-ba regras no prosedimentu atu ba Korea.
“Hanesan ita hatene katak, kultura husi nasaun ida ba nasaun seluk la hanesan, tanba ne’e mak ita hanesan Timoroan, liuhusi politika Sekretariu Estadu Formasaun Profesional Empregu, bainhira atu haruka ema ida atu ba servisu iha fatin ida ita tenki fó formasaun ne’ebé mak adekuadu no formasaun ne’ebé diak, atu nune’e bainhira sira servisu iha fatin ne’ebé mak sira ba, atu nune’e sira mós adapta ona ho servisu ne’ebé mak iha”. Nia rekomenda.
Sekretariu Estadu Formasaun Profesional Empregu, ne’e ba oin tenki hadia mekanismu sira hanesan traballador sira ne’ebé servisu iha nasaun hanesan Korea no Australia, ne’ebé dau-daun ne’e balu halai sai husi sistema kontra ona regras.
“Tanba ne’e ita tenki konsolida no haree fila fali tanba saida mak sira halai sai husi fatin ida ba fatin seluk, tanba problema ne’ebé mak sira sai husi fatin ida ba fatin seluk ne’e, la’os problema oin seluk lae, soke manan salariu vensimentu ne’ebé mak la hanesan, tanba ne’e mak liuhusi politika governu nian oinsá servisu hamutuk ho Adidu Embaixador Korea ho Australia, atu nune’e haree kona-ba problema hira ne’e. Nia hakotu.
Jornalista : Crispin Amaral
Editor : Agapito de Deus