Lafaek News-Relasiona ho kazu akontese iha tasi tolu ne’ebé oknum Polísia Nasionál Timor Leste (PNTL) basa traballadór na’in rua ne’e, sei levanta prosesu ba oin, tanba la komete krime hasoru PNTL.
Insidente ne’ebé mak akontese ba vitíma ne’ebe hetan agresaun fiziku husi oknum PNTL iha tasi tolu, 8/02/2021, sai viral iha Mídia Sosiál ne’e mak hanesan José soares no Satornino da Silva ne’ebé servisu iha kompaña Labelai.
“Ami tur duni iha kanpaun leten ne’e los, maibé momentu ne’eba oknum PNTL haruka ami rua basa malu hotu, oknum PNTL ne’e basa tan ami rua entaun ami rua sente striste tebes, nune’e ami hakarak levanta kazu ne’e ba oin,” deklara Vitíma Satornino da Silva ba Jornalista sira, Kinta (11/03/2021) iha Yayasan HAK Farol, Díli.
Nia haktuir, ami prontu no hakarak tebes levanta problema ne’e ba oin atu hetan nia solusaun, hamatuk ho maun sira tanba, ami la’ós halo krime, baku ami ne’e krime.
Nune’e mós, Koordenador Advokasia FONTIL, Ivo Colimau Lay Costa, hatete, aktu ne’ebé mak PNTL halo ba vitíma na’in rua ne’e hamosu desentendimentu públiku nian.
Atetude oknum PNTL nian ne’e la’ós de’it prekulasaun Sosiedade sivil nian, miabé preokupasaun mós ba públiku liu-liu iha Timor.
“Ita la’ós de’it atu kondena membru Polísia ne’e lae, atu mellora ita ninia instituisaun nia profisionálismu, kualidade, no dignidade instituisaun ne’e nia”, nia deklara.
Nia dehan, kestaun viola area tranzitu, nia sansaun iha prende karreta ka prende Dokumentus kareta nian ou fó sansaun ba sira ne’ebé mak mais adekuadu exersisiu ou edukativu hanesan halai ka Bomba rai.
“Sira mak hamoos fo’er sira ne’e, ita mós tenke dignifika sira, iha uma sira mos iha kualidade hanesan mos Xefe família, baku fali ema iha estrada públiku ne’e ita nia mentaliadade ne’e oinsa la serve para atu hatais farda, PNTL ne’e instituisaun ida ne’ebé mak atu proteze públiku no kuidadu povu la’ós mai aplika fali agresaun fisiku ba nia povu,” Ivo Kestiona.
Hatan ba kestaun ne’e, Portavoz PNTL, Superintendente Xefe Arnaldo de Araujo, hatete, buat hotu sei haree ba prosesu investigasaun ida ne’e mak PNTL nia regras ne’ebé dadaun ne’e sira iha.
“Komandu Jeral PNTL orienta ona komandante Unidades Espesial Polisia (UEP), loke prosesu investigasaun imediata ba membru refere núne’e bele hatene ninia envolvimentu to’o iha ne’ebé no nia asaun ne’e oinsa,” dehan Portavoz PNTL Arnaldo ne’e.
PNTL rasik iha lei disiplinar dadaun ne’e halo prosesu ba membru sira hodi hatudu katak komandu ne’e justu no firme ba membru sira bainhira halo atuasaun la tuir regras polísia nian.
“Membru ne’ebé halo atuasaun ba joven nain rua ne’e ita sei halo prosesu ho regra ne’ebé iha tiha ona tanba Atitude ne’ebé nia hatudu ne’e la justu,” Nia afirma.
Tanba, Komandu Jerál sempre ko’alia ho komandante sira ne’ebé haruka membru sira atu hala’o ninia servisu ho diak, maibé iha tempu balu situasaun ne’ebé la agradavel PNTL nafatin justu ho regras no disiplinar.
“Husi Komandu Jeral hatoo obrigadu wain ba Komunidade sira tanba komunidade maka bele sai lalenok hanesan matan ho tilun hodi haree no rona atuasaun membru sira nian neebe la tuir saida mak lei haruka,” Nia apresia.
Jornalista : Rita Moniz/Orlando Magno
Editór : Floriano Soares
