Lockdown Munisípiu Dili, Rendimentu Negosiante Ambulante Tun

Lafaek News—Ligadu ho kazu transmisaun lokal Covid-19 ne’ebé hahu aselera iha fatin-fatin ho ida ne’e governu deside lockdown Munisípiu Dili, maibé komunidade ne’ebé moris husi vida negosiante hahu halerik tanba ema laiha atu sosa modo no rendimentu tun maka’as.

Negosiante Carlota da Costa, informa, dader tuku 07:00 sai husi uma Maskarinas la’o ain to’o merkadu Taibesi tanba transporte públiku la halo movimentu, maske nune’e pasensia buka modo hodi hola tutan husi nia maluk sira iha merkadu ba faan fali iha aldeia 04 suku maskarinas.

“Ohin dader ha’u ba sosa modo la’o de’it husi Maskarinas tama too merkadu taibesi tanba trasporte públiku la halai hotu, atu hetan osan hodi sustenta ba familia uma laran ha’u tenke la’o to’o merkadu Taibesi,” dehan negosiante, Carlota da Costa, ba Lafaek News iha aldeia 04 Maskarinas, tersa, (09/03/2021).

Modo ne’ebé negosiante hola tutan no ba faan iha Maskarinas maka modo mutin, lakeru, kankun, brinzela, repoillu, pipinu, inklui tunu ho sate, maibé rendementu tun los no lahanesan ho loron bain-bain.

“Modo hirak ne’ebé ha’u sosa tutan iha merkadu Taibesi to’o agora ema la sosa hanesan bain-bain, to’o ona oras hanesan ne’e maibé foin hetan de’it $2.50, loron bai leet sedauk lockdown ne’e ha’u ba sosa mai faan hotu sedu no hetan to’o $10 ba leten, agora laiha liu hetan de’it $2.50,” nia informa.

Ho situasaun ne’e negosiante Carlota da Costa, senti triste tebes tanba ema laiha atu sosa, satan ami povu moris ho faan modo susar tebes atu hetan osan hodi responde ba nesesidade uma laran.

“Sente triste tebes ha’u nia moris mak loron loron faan de’it iha estrada ibun hanesan ne’e, durante lockdown ne’e, ha’u labele hetan osan tanba ema la naran sosa modo hanesan bai-bain, entaun araska tebes atu hare’e ba hahan loron-loron nian,” nia hakotu.

Jornalista        : Rita Moniz/Domingas Viana
Asisten Editór : Pedro de Almeida