Lafaek News—Tuir regra Ospitál Nasionál Guido Valadares (HNGV), bandu família pasiente ne’ebé hala’o hela tratamentu iha ospitál atu labele lori ema hosi liur mai prátika kurativu ai-moruk tradisional.
“Ha’u hakarak halo klarifikasaun, ba tratamentu tradisionál ne’ebé akontese iha HNGV, ne’ebe fó sai iha media sosiál, ami iha HNGV la autoriza atu halo tratamentu tradisionál ba pasiente ne’ebé admitida ou baixa hela iha ospitál,” Xefe Gabinete Kontrolu Kualidade Komunikasaun Sosiál, Sara Maria F. Xavier ba jornalista sira iha nia knaar fatin HNGV, tersa (05/01).
Afirma nia, kuandu pasiente hakarak halo tratamentu tradisionál ba nia aan ne’e bele, más bainhira alta hosi ospitál fila ona ba uma.
Salienta nia, bainhira pasiente refere sei hala’o hela tratamentu iha ospitál maka sei la autoriza kualker ema sé de’it atu mai aplika fali kurativu tradisionál.
Dehan nia, kuandu prátika tratamentu tradisionál akontese problema ruma ba pasiente, sé mak atu responsabiliza.
Jornalista : Sandi Belo
Editór : Ezequias Tomás
