Zumalai-(Lafaek News)—Operadór Eletrisidade Timor Leste (EDTL) postu administrativu Zumalai, munisípiu Kovalima, Anostasio Magno Moniz husu deskulpa ba klientes hotu relasiona ho eletrisidade lakan mate iha tempu kalan ho loron.
“Ha’u husu deskulpa ba populasaun iha postu Zumalai kona-ba eletrisidade ne’ebé lakan mate ida ne’e la’os ha’u mak halo, maibé faillansu iha Suai,” dehan Anostasio iha nia rezidensia Zumalai Kovalima, foin lalais.
Nia haktuir durante ne’e fukun eletrisidade mate lakan, tanba impaktu husi liña manutensaun failansu iha parte Suai, tanba eletrisidade mai husi ne’eba, maibé la’os iha postu Zumalai mak iha faillansu.
“Ha’u la’os maromak ne’ebé ha’u tenke halo lakan hela de’it eletrisidade maibé ida ne’e la’os ha’u mak kaer xave eletrisidade atu halak no hamate pesoal hau la gosta ha’u nia rai Zumalai ahi atu lakan mate,” Anostasio deklara.
Anostasio deklara, bainhira iha failansu nia la book aan tanba iha parte Suai la’os area iha Zumalai, bainhira EDTL Zumalai maka faillansu nia pronto normaliza kedan.
“Ita nia eletrisidade ne’e mai husi Suai, iha Zumalai ahi la’o normal la iha failansu maibé komunidade Zumalai balun fo sala fali mai ha’u nee sala, tanba ha’u halao ha’u nia knaar beibeik,” nia esplika.
Nia garante ba oin sei hadi’a di’ak liután atu komunidade sira la bele preokupa kona-ba eletrisidade.
“Planu ba oin ha’u sente eletrisidade lakan 24 oras tanba governu iha ona planu, ami mos atu sai empreza pábliku maibé agora lakan mate ne’e mos foin akontese iha fulan dezembru nia laran,” nia hatete.
Operadór ne’e mós preokupa tebes ho funsionáriu EDTL nian iha postu Zumalai ema na’in rua de’it maka halo manutensaun iha suku 8, no uza rasik transporte privadu.
“Ami na’in rua mak halo manutensaun iha postu Zumalai inklui Suku ualu hanesan, Suku Zulo, Lepo, Mape, Fatuleto, Lour, Tazhilin, Raimea no mos suku Usukain,” afirma nia.
Iha sorin seluk komunidade Zumalai, Abelino Magno, informa durante fulan dezembru tinan 2020 nia laran eletrisidade iha postu Zumalai lakan mate hodi rezulta komunidade sira nia sasán eletrónika balun hetan estragus.
“Iha fulan novembru no dezembru nia laran ahi eletrisidade lakan mate komunidade ami nia viziñu nia televizaun, reciver, no sasan eletróniku balun terbakar hotu,” Abelino relata.
Tan ne’e, husu ba parte EDTL ne’ebé servisu iha area postu Zumalai atu tau atensaun másimu hadi’a bainhira mosu failansu eletrisidade lakan mate.
Jornalista : Orlando Magno
Editora : Nelya Barros
