Lafaek News—Durante fulan dezembru tinan 2020 emerjénsia Ospitál Nasionál Guido Valadares (HNGV) rejista pasiente na’in 14 maka lakon vida iha sala emerjénsia.
“Total pasiente ne’ebé mate iha fulan dezembru hamutuk na’in 14. Na’in 6 mate iha dalan antes to’o emerjénsia no na’in 8 mate iha emerjénsia. Mate ne’e kauza hosi atakasaun fuan, pneomonia no moras seluk tan, ema sira ne’e ho idade 65 no iha labarik ida mak idade 9,” Xefe Gabinete Kontrolu Kualidade Komunikasaun Sosiál, Sara Maria F Xavier, ba jornalista sira iha nia knaar fatin ONGV, Tersa (05/01).
Informa nia, alende ne’e sala emerjénsia durante fulan dezembru tinan kotuk mós rejista pasiente ne’ebé mai halo tratamentu hamutuk 4.518.
Entretantu hosi total refere na’in 115 mak hetan asidente tráfiku motor no na’in 25 maka ho karreta, violensia fíziku 12, rama ambon na’in 1, hetan tuda ho fatuk na’in 6, pankada hamutuk na’in 4, veneno (racun) na’in 7, intokdikasaun asidentál na’in 5 no tanba tua na’in 7.
Alende ne’e durante tinan 2020 inan ne’ebé tama iha sala maternidade hamutuk 5643, hosi númeru refere partus hamutuk na’in 5.577.
“Partus normal hamutuk 4134, partu sezariana hamutuk 1093 no partu liuhosi ventoza hamutuk 368 no inan ne’ebé mak mate iha maternidade 2020 nian hamutuk na’in 8,” tenik nia
Enkuantu bebe ne’ebé moris iha loron 25 fulan dezembru hamutuk na’in 26 no iha loron 1 fulan no tinan ida ne’e bebe moris hamutuk na’in 12.
Jornalista : Sandi Belo
Editór : Ezequias Tomás
