Lafaek News— Eskola Portuguêsa Ruy Cinaty Dili kontinua hala’o atividade aprendizajen mezmu Ministériu Edukasaun Juventude no Desportu (MEJD), suspende prosesu aprendijazen no inskrisaun ba estudante iha eskola públiku no privada ba prevensaun surtu globál COVID-19.
Ministériu Edukasaun Juventude no Desportu (MEJD), hatun desizaun ida ne’e hodi suspende provizoriu atividade eskola durante semana rua nia laran hodi bele servisu hamutuk ho Ministériu Saúde halo supervizaun ba eskola sira iha teritóriu laran tomak.
Observasaun Lafaek News iha terenu nota iha eskola privadu Portuguêsa Ruy Cinaty Dili, kontinua hala’o atividade prosesu aprendizajen, tanba inan-aman sira tula oan ho karreta husi uma ba hatun hela iha eskola.
Entretantu bainhira jornalista Lafaek News tenta atu halo konfirmasaun ho superior hosi eskola refere hodi hatene razaun kona-ba prosesu aprendizajen iha eskola refere sei la’o hanesan normal, maibe parte seguransa la autoriza hodi dehan la iha orientasaun ruma atu bele autoriza tama ba halo konfirmasaun.
“Labele tama, ne’e hein orientasaun hosi sira, sira hatan tama mak bele tama, sé la hatan ha’u mós labele halo buat ida,” dehan seguransa ba ekípa LafaekNews
Jornalista: Ekípa LafaekNews
Editór : Ekípa LafaekNews
