Lafaek News– Vise Xefe Bankada partidu Congresu Nasionál Rekonstrusaun Timor (CNRT), Patrocínio Fernandes, konsidera Oitavu Governu Konstitusionál lideradu Jeneral Taur Matan Ruak, halo regra ba estadu emerjénsia bandu ema halibur malu liu na’in 10, tenke uza máskara no mantein distánsia fíziku la reflete ba realidade, tanba governu rasik mak viola hela.
“Ha’u hanoin dekretu governu ne’ebé sai ona, governu presiza pondera fila fali sira nia hanoin para bele ajusta ho realidade ne’ebé iha. Tanba primeiru reuniaun konsellu ministru no parlamentu ninian liu do’ok ona ema na’in sanulu, ba ha’u dekretu lei ne’e sei la funsiona,” Patrocínio ba Lafaek News iha resintu PN, tersa (05/01)
Reforsa nia, governu presiza hare didi’ak asuntu refere, atu nune’e dekretu ne’ebé hasai ema labele viola sé lae ne’e ema bele kumpre ou bele la kumpre.
“Ha’u hanoin governu trata asuntu sira ne’e la ho kuidadu karik, sé povu Timor tomak la kumpre, governu tenke halo tan komarka barak-barak para depois ema bele tama hotu iha ne’ebá,” nia katak
Tanba tuir nia hare, governu hanesan hare moras refere foun fali ba nasaun ne’e tanba ne’e mak hasai regra ida ne’ebé ladún kondís ba realidade ne’ebé iha.
“Estadu emerjénsia la’ós foin dala ida, maibé hahú husi primeiru mai to’o dala ualu, agora halo fali ida extra (regra rigorozu) liu fali estadu emerjénsia primeiru to’o dala ualu nian, uluk númeru pozitivu sa’e to’o 40 – 50, maibé buat hotu la’o di’ak. Ne’e hatudu katak governu pániku ba situasaun estadu emerjénsia,” afirma nia
Argumenta nia, seidauk iha da’et entre ema ba ema iha komunidade nia leet, entaun governu presiza de’it agora maka reforsa seguransa iha odamatan boot ne’ebé baibain ema tama mai ita rain no mós presiza tau atensaun ba fasilidade ne’ebé barak mak seidauk kompletu atu nune’e ita ninia prevensaun ne’e másimu duni hodi evita propagasaun ba pandemic refere.
“Ita seidauk iha asuntu ida tranzmisaun lokál, ha’u hanoin katak governu di’ak liu konsentra hodi tau matan didi’ak ba kuarentena sira, hadi’a fasilidade, aumenta ekipamentu, kontrola didi’ak Fronteira sira para depois ema tama sai ne’e ita tenke hatene,” nia sujere
Tanba ne’e ikus reprezentante povu ne’e nafatin husu, governu presiza tau atensaun makas liubá maka fasilidade no halo tratamentu ida di’ak ba ema liuliu sira ne’ebé pasiente COVID-19 atu nune’e labele afeta fali ba ema ninia psikolojia.
Lia hirak ne’e nia hato’o, relasiona ho desizaun governu nian liuhosi reuniaun konsellu Ministru aprova ona projetu dekretu governu, ne’ebé aprezenta hosi Primeiru Ministru en ezersisiu José Maria dos Reis, kona-ba medida ba ezekusaun estadu emerjénsia nian ne’ebé renovadu hosi dekretu Prezidente Repúblika Nu. 73/2020 loron 30 fulan Dezembru hatán ba pandemic COVID-19.
Estadu emerjénsia ne’ebé agora renovadu abranje territóriu nasionál tomak no hahú vigor iha oras 00:00 loron 3 fulan Janeiru to’o tuku 23:59 kalan loron 1 fulan Fevereiru tinan 2021.
Dekretu governu ne’e rekomenda ba ema hotu ne’ebé la sujeita ba izolamentu obrigatóriu no ne’ebé la hala’o kualkér atividade profisionál atu marka prezensa iha servisu fatin tenke hela iha uma, bainhira la’o ain iha fatin públiku tenke la’o mesak no uza máskara no mantein distánsia fíziku pelumenus metru 1 hosi ema la’o ain sira seluk no evita halibur malu.
No ema hotu tenke nafatin mantein distánsia pelumenus metru 1 bainhira atu tama ba loja laran, fatin prestasaun servisu nian no mós iha fatin hirak ne’ebé pasajeiru hein transporte públiku atu tula pasajeiru. No ba ajente seguransa sira tenke sensibiliza ema hotu atu bele kumpre saida maka hatuur ona iha dekretu governu.
Kuandu ajente seguransa identifika ema ne’ebé la kumpre no hato’o keixa ba ministériu públiku kona-ba saida mak akontese, no ba ema sira ne’ebé viola sei assume responsabilidade kriminál tuir regra ne’ebé hakerek iha kódigu penal. Tanba tuir kódigu penal artigu 244 kona-ba dezobediénsia, hatete katak ema ne’ebé la halo tuir mandadu lejítimu komunikadu regulamentu ne’ebé autoridade ka funsionáriu kompetente maka sei hetan pena prizaun tinan 3.
Jornalista : Ekipa Lafaek News
Editór : Ezequias Tomás
