Hakerek Husi: Pe. Martinho S. G. Gusmão.
Hahu kedas CORVID19, ita nia caso iha Timor-Leste ne’e hanesan “fantasma” – mate klamar nebe habosok labarik sira, mosu lakon mosu lakon hela deit. Wainhira PM de facto Taur Matan Ruak ba ferias loron boot, derepente CORVID19 mai hanesan roket, husi 3 ba 10 ba 13 no agora too ona 15. Oinsa mak mosu lais los hanesan ne’e? Tan sa mak ita “sukses” too numero 15, wainhira mundo tomak hahu hetan VACINA ona??
Wainhira hahu ESTADO DE EMERGENCIA (Março 2020), hau dehan ona Timor-Leste sei tama iha EMERGENCIA DE ESTADO. Agora resultado, laos ona VIII GOVERNO “viabilizado”, maibe sai ona governo “patinado”, hodi nune’e Deputado sira nebe hadau poder hahu panico tan hakarak ka lakohi Governo tenki mout. Maibe, la importa: Governo monu ka la monu, ema la interesse ona. Buat nebe bolu atenção mak HONESTIDADE no CERTEZA.
Hau hakarak hatur pergunta lubuk ida, nebe iha tempo hirak tuir mai hau sei halo analisa ida ba ida too rohan.
1) OGE2020 nee iha tebes ka lae? Se osan iha karik, halo lerek saida mak urus deit caso CORVID19 fulan-fulan mak kuit oan ida, la hotu rai? VIII Governo “viabilizado”, hatudu duni katak la viabiliza buat ida. Hanesan ditado Portugues ida dehan, “a montanha que pariu um rato” – (isin rua) boot hanesan foho ida maibe hasai laho oan ida deit. Liafuan “viabilizado” nee hatudu katak Partido Fretilin (maski ai-tonka kulapru) maibe maka’as duni hodi tane metin PLP ho KHUNTO; halo buat hotu mesak furak no kmanek, boot no kmook. Maibe, “maioria” ida ne’e ninia servisu mak urus deit CORVID19 ida, ida, ida, ida, ida, ida, ida, ida, … agora mak “sukses” hetan 15 … Agora hau mak husu ba hau an rasik, be CORVID19 aumenta numero ne’e, ida ne’e “prestasaun” (successo) boot ida ka “failhado, sem vocação”? Ba hau, aumenta numero nee laos ona VIABILIZADO, maibe RIDICULARIZADO (pengaburan makna; pembodohan).
2) Hahu husi Março 2020 tun mai, Maun Boot Mari Alkatiri ninia “capacidade” mak asalta Xanana Gusmão! Wainhira Maun Boot Lu-Olo ho Taur Matan Ruak ho suporta husi komando khusus Aniceto no Naimori koko atu funu hasoru CORVID19 (no, sira na’in 4 sukses hasae numero ba 15), Mari Alkatiri loro-loron “sibuuuk” hasoru Xanana … hanesan los Anis Baswedan ho Habib Rizkie hasoru Ahok. Dala ida tan, Mari Alkatiri iha kbiit atu “VIABILIZAR”, maibe tan dudu Governo patinado nee la ba oin, agora hahu RIDICULARIZAR. Liu-liu ita la hatene, Governo ne’e VIABILIZADO atu kaer ukun, ka, Governo ne’e kaer ukun atu halo fali OPOSIÇÃO hasoru Governo. Linguagem nebe Maun Alkatiri usa ne’e, hanesan ema ida nebe moras kleur ona nudar “oposição”, wainhira hadau tiha ukun, nia haluha tiha sai governo maibe ko’alia fali hanesan oposição. Hodi liafuan seluk, RIDICULO ne’e iha ne’e – kaer ukun nudar governo maibe mental sei oposição.
3) Ba hau, Xanana Gusmão ne’e COMANDANTE duni. Comandante sira iha funu laran, KILAT tarutu loron kalan ne’e mak diak … nune’e nia ho soldado sira lalika tauk. Comandante sei bingung no hahu frustrasi, wainhira kilat la tarutu. Iha funu laran, kilat tarutu ne’e halo guerrilheiro sira la tauk ona … tan sira hatene ona inimigo nia posição; kilat hira; soldado inimigo hira … sura los ona. Ne’e be, loron ba kalan Mari Alkatiri tarutu hela deit, nee Xanana Gusmão mak diak faliiiii … nia hatene ona, katak Alkatiri pânico hela nune’e rajada loron kalan, assim que sura ba mak hela ultima bala ona, Xanana reket nehan deit ona …! Hau hanoin, Xanana manan molok funu … Alkatiri pânico molok hakfodak, bala hela ida deit ona … eleição.
4) Hau surpresa, maibe la hakfodak … tama Mercado TAIBESSI … la iha ema ida mak tauk CORVID19. Hau husu maluk ida iha Mercado ninin, … nia hamnasa loke hotu mak dehan “CORVID19 mai barak liu tan diak liu tan, atu nune’e Estado bele bokur” … CORVID19 la iha mos ita sei mate duni, CORVID19 iha mos ita mate nafatin. Depois, nia halo pergunta ida ba hau, “Amo, tan sa mak sira be servisu hasoru CORVID19 la kona … depois ema hirak nebe nunca hasoru pasiente CORVID19 kona fali no too 15 ona?” … wow!!! Hau nia pergunta oinseluk – “tan sa mak pessoal husi Saude nian la iha prediksaun, de repente nia sae lalais kedas ba 15?”, Depois numero sae tiha, ema hahu declara katak lori naran sala, aviaun mak tama sala, mate isin mak lori sala … 1001 razões ridículos.
Tinan foun, moris foun. Para ona ho CORVID19 … mundo ohin loron hetan tiha ona VACINA, no prepara an hasoru vírus foun. Se durante ne’e mundo “jempol” ba Timor-Leste tan la iha CORVID19, keta lori fali mundo hamnasa ita tan ema ba fatin seluk, ita fohin mak tama fali ba fatin ne’e …! Ou, keta halo ita hasae numero CORVID19 ne’e sai lalais ba 15, dps ba 150 sae ba 1500 … atu OGE2021 nee bele sosa aimoruk VACINA …??? Depois “faan povo nia moris”, hetan osan atu “sosa povo nia voto” iha eleição 2022 no 2023?? WUALAHUALAM …
Uluk ami sira be moris iha Indonesia nia liman ne’e rona musica Iwan Fals nian dehan MENANTIvvv KEJUJURAN, HARAPKAN KEPATIAN.
