EKONOMIA · 11 Jan 2021 04:18 ·

Sakrifika Aan ba Alin Atu Hetan Futuru Nabilan


Sakrifika Aan ba Alin Atu  Hetan Futuru Nabilan Perbesar

Lafaek News—Negosiante ambulante Martino Gomes (25), afirma moris hanesan oan mane ne’ebé mesak ho feton na’in 7 no na’in 2 seluk ne’ebé sei ki’ik hakarak eskola, sente iha responsabilidade ne’ebé boot tanba haree ba kondisaun ekonomia uma laran ne’ebé la iha kbiit, deside aan para nia estudu hodi support nafatin alin doben sira nia estudu atu nune’e bele hetan moris di’ak iha futuru.

Moris iha mundu la fasil no la iha milagre ida maka bele mosu kuandu tuur hodi hein de’it, tanba ne’e hakarak ka lakohi ema idak-idak tenke ho konxiénsia rasik dezenvolve aan atu nune’e bele hala’o moris ne’e maski ho kondisaun ne’ebé kuaze limitadu.

Hanesan oan mane mesak ho feton na’in 7, Martino Gomes hanesan oan ba da Hat, hosi feton na’in 6, só úniku nia feton na’in 2 ne’ebé sei ki’ik mak eskola, na’in 4 seluk la eskola no ida forma ona uma kain.

Nu’udar oan mane mesak no sente iha responsabilidade boot sakrifika nia futuru hodi fa’an modo atu nune’e bele support nia alin domin feto ki’ik na’in 2 nia eskola, tanba ho prinsípiu ida katak maski “ha’u beik no terus maibé lakohi alin sira beik no terus hanesan ha’u.”

Prinsípiu ida ne’e mak kesi metin iha nia fuan hodi sakrifika nia futuru no nia tempu atu bele fa’an sasán hodi support nia alin sira, maski iha nia fuan laran mós hanoin hela ba nia futuru, maibé nia obrigadu tenke kumpre tanba hanesan maun ida ne’ebé hadomi tebes nia alin lakohi atu lakon oportunidade osan mean ne’ebé bele mai dala ida iha nia moris tomak.

Tuir mai iha konversa ho jornalista Lafaek News Martino Gomes (25), haktuir kona-ba ninia atividade ne’ebé hala’o loron-loron hodi support nia alin sira nia futuru no mós hakarak halo mudansa ba moris hosi terus ba moris di’ak.

“Ha’u sai husi uma Taibesi tuku 8 dadeer saan hodi dudu karrosa ba fa’an modo iha Dili laran tanba de’it nesesidade ekonomia uma laran la sufisiente, no liu hosi fa’an modo hakarak muda ha’u nia moris no hakarak moris ne’e hanesan mós ho maluk joven sira seluk,” Martino relata ba Lafaek News ho oin triste kahur ho matabeen iha Faról, kinta  feira (07/01).

Hatutan nia hodi konta uitoan kona-ba prosesu bainhira fa’an modo, iha tempu normal antes tama ba estadu emerjénsia modo folin tebes maibé hafoin governu deside hodi implementa estadu emerjénsia komesa ladún folin tanba menus comprador.

“Kompara uluk fa’an ho agora diferensa tebes, seidauk tama ba surtu Covid-19 fa’an loron ida bele hetan to’o $30 dolar, maibé agora tama ba estadu emerjénsia dala ruma loron ida ema hola de’it $5. Maski ho rendimentu ne’ebé menus la hanesan uluk, la habaruk ha’u hodi kontinua fa’an maski dala ruma mós ema la sosa modo to’o dodok soe de’it ba lixu,” subliña nia

Ikus nia argumenta, estudu paradu hodi ba fa’an modo tanba família la iha kbiit atu support, au mezmu hare mós ba alin ki’ik na’in 2 ne’ebé hakarak eskola, hakarak ka lakohi hanesan maun sakrifika aan hodi atinji mehi alin sira nian.

Nia dehan, alende ne’e osan ne’ebé hetan maski uitoan nia koko tau hamutuk, balun support alin sira no han hemu uma laran, maibé la haluha balun nia rai atu nune’e tinan oin bele kontinua fali ninia estudu iha kadeira universitáriu, maibé nafatin mantein ho atividade ne’ebé daudaun ne’e nia hala’o.

“Ha’u hosi munisípiu Ermera, no remata estudu sekundáriu iha Gleno, agora daudaun ha’u la kontinua estudu iha ensinu superior tanba família la iha kbiit. Razaun ida ne’e mak ha’u foti desizaun fa’an modo, no osan ne’ebé iha balun haruka ba foho hodi support fali alin na’in rua nia eskola, osan restu rai hamutuk tanba ha’u iha mehi hakarak tinan oin kontinua fali estudu iha universidade,” hakotu nia ho oin triste kahur ho hamnasa uitoan hodi hato’o lisensa ba jornalista Lafaek News atu kontinua fali ninia atividade

 Kontributora : Domingas Viana

  Editór           : Ezequias Tomás   

 

1,148 Views
Artikel ini telah dibaca 17 kali

badge-check

Editor

Baca Lainnya

ILO Ho Tradelnvest  Haforsa Negosiu Nu’u Ba Coconut Oil Iha TL

23 May 2024 - 17:26

BUNDA Loke Servisu ba Komunidade Liu Husi Transforma Aihan Lokal ba Aihan Modernu   

26 April 2024 - 23:24

Traballadór Austrália Fulan 1 Manan $ 4.000 Too $ 5.000

26 April 2024 - 09:13

FJDE Apoiu EhD Dezenvolve Setor Kafe Uut Sirkula Ona Iha Merkadu Nasional

22 April 2024 - 15:52

Grupu Hortikultura Maudiu II Glenu Fulan 1 Hetan $ 2400, Sosa ona Kareta 2 Ho Uma Luxu 3

22 April 2024 - 15:28

SEKopp Halibur Movimentus Kooperativa Nudar Baze Fundamentu Ekonomia Família

6 April 2024 - 12:44

Trending di EKONOMIA