Lafaek News—Estudante no komunidade sira preokupa ho implementasaun regra estadu emerjénsia ba dasika hosi governu hodi bandu ema hotu labele halibur malu maibé governu rasik kontinua fó liberdade ba pasajeiru atu tama no sai ho aviaun iha aeroportu.
Tuir estudante universitáriu públiku (UNTL), Aldrovaldo Leki Nahak, sente konfuzaun ba desizaun ne’ebé governu rasik hasai hodi dehan taka aeroportu no fronteira maibé agora loke hikas fali signifika governu rasik mak hakarak importa fali moras ne’e mai ita rain.
Afirma nia, foin lalais loron hirak liubá akompaña notísia pasajeiru ho aviaun komesa halo viajen fila fali hodi tama no sai iha aeroportu.
“Ha’u haree iha media, aviaun tula pasajeiru sira iha loron hira liubá, ida ne’e hanesan governu rasik la toma responsabilidade (ba polítika hodi kombate COVID-19), ida ne’e hanesa polítika de’it,” Aldrovaldo ba Lafaek News sábadu semana iha Kaikoli.
Dehan nia, tuir loloos desizaun ne’e mantein, bele fó lisensa maibé espesiál ba ai han ne’ebé atu tama mai maibé liga-ba movimentu ema nian tuir loloos hapara nune’e bele evita propagasaun pandemic COVID-19.
Entretantu iha sorin seluk estudante hosi UNTL, Agripino Lobato mós reforsa lia hanesan hodi kestiona ba desizaun governu nian ne’ebé nia konsidera hakarak halimar fali ho destinu ka moris povu ninian.
Dehan nia, governu rasik deside taka fronteira no aeroportu ho objetivu atu prevene moras ne’e labele tama mai ita rain, maibé agora loke hikas fali, signifika regra sira ne’ebé prevee iha dekretu governu ne’e vale de’it ba povu ki’ik sira maibé ba governante sira dekretu ne’e la vale mezmu sira rasik maka deside liuhosi enkontru ezekutivu (KM).
“Tanba sá mak governu loke nafatin aeroportu hodi lori pasajeiru sira iha estranjeiru mai iha Timor, ita la hatene iha aviaun laran ne’e pasajeiru na’in hira mak iha laran no pasajeiru sira iha aviaun laran ne’e (ita la hatene sira iha moras ka lae) I tuur tuir distánsia ka lae,” Agripino ba jornalista Lafaek News iha Largo-Lesidere sábadu semana ne’e.
Alende ne’e Mateus Soares (Komunidade), hatete, hanesan povu kumpre ba regra ne’ebé governu haruka katak la’o tenke distánsia fíziku pelumenus metru 1, uza máskara no labele halibur malu ho objetivu prevene aan hosi moras ne’e, maibé regra ne’ebé hodi obriga povu kumpre fila governu rasik maka viola fali tanba iha parte ida hamate moras ne’e nia da’et maibé sorin ida governu rasik maka hamoris fali moras ne’e hodi da’et ba povu tanba loke hikas fali aeroportu no fronteira ba ema tama no sai.
“Regra sira ne’ebé ita boot sira fó, ami tuir nafatin no hakaruk ba regra ne’e. Maibé ita boot sira fila kontra regra ne’e, hanesan loke nafatin Aeroportu hodi pasajeiru sira iha estranjeiru halo viajen ba mai,” dehan nia iha Largo-Lesidere
Entretantu komunidade Mariano Sarmento, hato’o mós ninia lamenta saun ba governu, tanba hasai tiha regra ne’ebé rigorozu hodi prevene pandemic ne’e labele da’et ba povu sira maibé governu rasik maka viola fali hodi nafatin loke pontu entrada sira.
“Regra sira ne’ebé mak ita boot (governu) sira fó ne’e rigorozu tebes ona, maibé governu rasik la kumpre regra, dehan aeroportu hotu taka maibé aeroportu loke nafatin atu estranjeiru sira halo viajen hosi nasaun ida ba nasaun seluk (mai Timor Lorosa’e),” lamenta nia
Reportajen: Domingas Viana/Rita Moniz
Editór : Ezequias Tomás
