Lafaek News—Rezidénsia Eis Prezidente Repúblika dahuluk RDTL no Proklamadór, Saudozu Francisco Xavier do Amaral, ne’ebé estadu rekonstrui iha suku Kaemauk Turiskai seidauk entrega ba família kondisaun infra-estrutura at da-daun.
Iha kobertura espesial Lafaek News, iha suku Kaemauk postu administrativu Turiskai munisípiu Manufahi, konsege hasoru malu ho proklamadór Francisco Xavier nia beioan rasik sira, ho espresaun triste katak sira la sente saida mak Ukun Rasik An no valor husi Ukun Rasik An.

Iha entrevista, ho beioan ne’ebé nudar jerasaun dahuluk husi saudozo proklamadór Francisco Xavier do Amaral, Francisco Simões hateten, dezde Timor-Leste ukun an too ohin família seidauk sente valor hosi ukun rasik-an, tanba ema ne’ebé uluk partisipa iha funu hala’o hosi rezisténsia no tabik hamutuk ho ema liman kroat sira mak ohin loron goja Ukun An, maibé ema sira lakon familia no inisia ukun rasik an, sai fali adeptus ba Ukun Rasik An.
“Dezde Timor ukun an too agora ami família sei moris iha triste laran, tanba ami la sente valor hosi ukun rasik an ne’e, ami triste lliutan rezidénsia saudozo Xavier nian abandona, seidauk iha ema ida mak hanoin atu halo rehablitasaun no família mos labele atu hela tamba seidauk iha desizaun hosi estadu atu entrega ba família tamba ne’e família konsideira hanesan patrimóniu do estadu no bele mos sai hanesan museum atu arquivo imajen historia luta ba libertasaun nacional.”
valorizasaun ne’ebé governu no estadu oferese ba proklamadór Francisco Xavier do Amaral hanesan osan veteranus no titulares, família konsideira hanesan patrimóniu estadu, tanba dezde matebian husik hela mundo nee’ate agora laiha desizaun ruma hosi governu ba família atu utiliza rezidénsia ne’e, ezizensia hirak ne’e aprezenta ona ba Primeiru Ministru maibe to agora sedauk iha resposta adekuadu,” Hateten Francisco Simões.

Iha fatin hanesan xefe suku Kaimauk Manuel Mendonca Rodriques hateten,Rezidénsia nee hari husi kompañia balun husi gabinete prezidente da repúblika iha tinan 2011 liu ba ho montante osan rihun rua nulu resin ualu ( 28.000 ) no iha momento ne’eba nia mos sai hanesan badaen ida iha prosesu konstrusaun too uma ne’e remata estadu seidauk deside entrega ba iha parte família.

“Iha momentu hari Rezidénsia ne’e atan ha’u mos hanesan ema badain ida ami servisu hamutuk ho ekipa kompañia ida husi Gabinete Prezidente Repúblika iha altura ne’eba iha mandatu sira nian, uma ne’e gasta orsan bo’ot, maibe too Avo Xavier mate nia nunka sama dala ida iha uma ne’e too uma ne’e hotu estadu seidauk entrega ba iha parte família,” Manuel relata.
Manuel Mendonca Rodriques haktuir hare ba kondisaun rezidénsia ne’ebé komesa naksobu ba da-daun nia parte aprezenta ona ba Prezidente Repúblika José Ramos Horta iha momentu halao vizita ba rezidénsia nee hafoin remata lansamento kona-ba eskola São Amigo ho Australia iha suku kaimauk, Prezidente Repúblika hateten atu halo renovasaun ba rezidénsia ne’e presija gastus orsamentu ho montante um mil (100.000) ba leten atu bele hadia fali rezidénsia proklamdór nian.
“Iha momento Sua Exelénsia Prezidente Repúblika hala’o visita ida mai halo lansamentu ida kona-ba eskola nian São Amigo ho Australia Prezidente Ramos Horta hakat liu mai iha residensia hetan akompanamentu husi lia nain no komunidade iha suku ne’e no prezidente hateten atu halo renovasaun ba uma ne’e presija orsamentu ho montante 100.000. ba leten.
Autoridade suku ne’e haktuir, tuir planu família sei tuur hamutuk hodi deside rezidénsia ne’e sai hanesan fatin istóriku ba Timor-oan tomak, no iha ne’eba bele rai imajen rejisténsia sira nian.
Tuir observasaun Jornalista Lafaek News nota katak, uma nia lolon komesa nakloke, plafond sira komesa dodok, no tempu udan be’e sulin tama ba laran liu hosi Palaka leten.no iha rezidénsia laran prepara mos fatin deskansa ba Prezidente Repúblika, Primeiru Ministru no Prezidente Parlamentu Nasional.
Ekipa Kobertura Lafaek News
Editor Textu : Agapito de Deus